ده‌نگی سه‌ربه‌خۆ

ده‌نگی سه‌ربه‌خۆ

 

گروپی تیرۆریستی داعش، دوای داگیرکردنی موسڵ‌‌و دەست بەسەراگرتنی ناوچەیەکی فراوانی عێراق، بارودۆخی سیاسی‌ عێراق و کوردستانی بە ئاراستەیەکی مەترسیدارو نالەباردا  گۆڕیوەو راستەوخۆ بوەتە هەڕەشە و مەترسیەکی گەورە  بۆ سەر ژیان و گوزەرانی خەڵك‌‌.  ئەم گروپە تیرۆریستە کە بێباکانە سەدان  دیلی سوپای عێراق قەتڵو عام دەکات‌‌،سەدان هاوڵاتی مەدەنی‌و بێدیفاعی  سەر بە ئاینی مەسیحی و یەزیدی کۆمەڵکوژ دەکات‌و وێنەکانیشیان لە میدیاکانەوە بڵاودەکاتەوە، دەستدرێژی جنسی دەکەنە سەر ژنان‌و کچانیان، هەڕەشەی مل پەڕاندنی هەرکەسێك  دەکەن کە پەیڕەوی لە شەرع‌و یاسای ئەوان نەکات‌،  گروپێکی تیرۆریستی مرۆڤکوژ‌و دڕندە کە هێزو ئیمکاناتی دەوڵەتێکی لەبەردەستدایە، توانای خوڵقاندنی کارەساتی گەورەی مرۆیی زیاتری هەیەو  مەترسیەکی جدیە بۆسەر  ژیان‌و ئایندەی کۆمەڵگای عێراق‌و کوردستان. بۆیە جگە لە بەرەنگار بوونەوەو بەرپاکردنی جەنگ لە دژی‌ ئەم هێزە تیرۆریست‌و ئینسانکوژەو پاکردنەوەی ناوچەکە لێیان، رێگەیەکی ترمان لەبەردەمدا نیە بۆ پاراستنی ژیانمان‌و  بۆ دابینکردنی ئارامی‌و ئاسودەیی و گەرانەوەی ئاسایش بۆ خەڵکی.

 

بەڵام ئەزمونی دوو مانگی رابردووی شەڕ لەگەڵ داعش ئەوەی سەلماندوە کە تەنها پشت بەستن بە هێزە چەکدارە رەسمی و حیزبیەکان، بەس نیە بۆ بەرەنگاربوونەوەی داعش‌و نەهێشتنی مەترسییان لەسەر ژیانی خەڵك‌و  دابینکردنی ئارامی‌و ئاسایش. خەڵکی موسڵ‌و شەنگارو ناوچەکانی دیکە لە نێوان ئاوارەیی‌و کۆمەڵکوژی‌و ژیانی ملکەچیدا هەڵبژاردنێکی دیکەیان بۆ نەمایەوە. دوای ئەو کارەساتانە، مەسەلەی چەکداربوونی خەڵك بۆ بەرەنگاربونەوەی داعش بوەتە پرسێکی گرنگ‌و  پێداویستیەکی دەستبەجێ کە لەچەند جێگا جەماوەر خۆیان دەستیان بۆ ئەم کارە بردوە.

 

ئێمە وەکو کۆمەڵێك هەڵسوڕاوی سیاسی‌‌ ئازادیخواز کە بڕوامان وایە دەبێ مەترسی داعش لەسەر کۆمەڵگا دووربخرێتەوە‌و  ئەو  ڤایرۆسە کوشندەیە بنەبڕ بکرێت، وە لەو سۆنگەی بەرپرسیارێتیەوە بەرامبەر بە خەڵک و کۆمەڵگا، بە توندی و بەوپەری توانا بەرگری لە چەکداربوون‌و رێکخستنی جەماوەر دەکەین‌ بۆ بەرەنگاربونەوەی داعش‌، بۆیە لە رێگای ئەم راگەیاندنەوە پێکهاتنی "دەستە چەکداریەکانی بەرگری جەماوەری" رادەگەیەنین‌.

 

بانگەوازی هەموو ئەو ئینسانە تێکۆشەرو ئازادیخوازو ئینساندۆستانە دەکەین کە خۆیان بە هاوڕای ئێمە دەزانن بۆ بەرەنگاربوونەوەو شەرکردن لە گەڵ داعش، بە ئێمەوە پەیوەست بن بۆئەوەی پێکەوە بتوانین سوپایەکی گەورەی بەرگری جەماوەری لەسەراسەری کوردستان دا دروست بکەین‌. هەر کەسێك لە( ژن‌و پیاو) کە بڕوایان بە بەرەنگاربونەوەی داعش‌و  دەرپەڕاندنیان لەناو کۆمەڵگا هەیە، هەربۆچونێکی فکری‌و سیاسییان هەبێ یان سەر بەهەر نەتەوەو ئاینێک بن‌، دەتوانن ببنە ئەندامی ئەم هێزە جەماوەریەی دژی داعش. هاوکات خۆمان بە هاوکاری هەموو ئەو دەستەو گروپە چەکداریە جەماوەریانە دەزانین کە تائێستا دروست بوون‌‌و بانگەوازیان دەکەین بۆ پێکەوە کارکردن. ئێمە بڕوامان بەوەیە کە دەبێ ئەم هێزە جەماوەریەی کوردستان پاڵپشتی هێزی بەرگری جەماوەری بێت لەناوچەکانی دیکەی عێراق  کە لەدژی داعش پێکدێن‌و هاوکاری لێبڕاوانەیان بکات. با هەموو پێکەوە بۆ دامەزراندنی هێزی بەرەنگاری جەماوەری قۆڵی لێ هەڵماڵین بۆ دەرپەڕاندن و راماڵینی داعش لە ناو کۆمەڵگای کوردستان‌و عێراق و ناوچەکەدا.

 

بژی هێزی بەرگری جەماوەری

   

دلاوەر مونزیر                                                  عیرفان کریم                                        بەختیار نادر       

موحسین کەریم                                       خلیل حمە حسن                   وەستا حسین ساڵح 



 لەرێگای ئەم ژمارە تەلەفۆنانەنەوە دەتوانن پەیوەندیمان پێوە بکەن؛

٠٧٧١٠٢٤٣١١٨       ٠٧٧٢٥٠٠٣٠٨١                            ٠٧٧٠١٩٥٧٥٨٨

 

پەیجی هێزی بەرگری جەماوەری  لە فەیس بووك: 

https://www.facebook.com/pages/Hezybargry/751851058212613

ئەدرێسی ئیمێڵی هێزی بەرگری جەماوەری:                     ئەم ئیمەیڵە پارێزراوە لە سپام, پێویستە جاڤا سکریپت چالاک بکەیت بۆ بینینی.

چوار شەممە, 20 ئاب 2014 14:28

باوکی دوین - تەمەنی ......... وەرز

 

چەند دێڕێکی پڕ لەحەسرەت لە یادی مردنی  جوانەمەرگ  .هاوڕێی خەم و هۆنراوە     ئەحمەد فەرەج کاکل  داوام لە بەزەیی ئاسمانە رۆحی  شاد بێت .........! چەند دێڕێک  بەسۆزی دەنگی  ئاوازی خەم  کاک کەریم کابان  و سوزی  قەڵەمی شاعیر .  

.

 

باوکی دوین

 

ئەی تەمەنی

بێ بەش لەژین

ئەڕۆی ئاوڕ نادەیتەوە

لە هەموو چرکەیەکە

دێڕێک لە  ژین

دەسڕێتەوە

خۆزگە منیش

هەموو ژینم

 هەر لەیادی ئێوە بوایە

ئەو ساتانەی ژیانی مەست

بەهەشتێ بوو ئەم دونیایە

 کوا تارای شەفەقی دڵ

کوا کاروانی

شەوگاری وێڵ

هەمووی یادێکی

  بەسەر چوو

تەنها چڵێک لەخێڵ ماوە

 

 

هەر لەژینی منداڵیوە

میوانێک بوو بەهاری دڵ

هەموو یادێکت میوان بوو

تەنها ناوت لەدڵ ماوە

هەر لەعەشقی  شەوگاری دڵ

شەوانی عەشقت سێبەر بوو

لەتریفەی مانگە شەوە

خۆزگەو ئاواتمان تێپەڕبوو

کوا پەپولەی شەوانی تیشک

کاتێک گەرام بەدواتانە

قاچم  هەڵکەوت لەرێگاتان

هەتائیستا خەم میوانە

 

لە چۆڕاوەی   هەسارەی شەو

شەوگاری یادمان بەڕێ کرد

لە بەهاری هاورێتیمان

ڕیبواری شادیمان وێڵ کرد

کوا ساباتی خٶشەویستی

سۆزو  ڕازی برایەتی

هەمووی  هەموی

 بەسەر چوو

تەنها یادت لەدڵدایە

 

ئەی هاورێیان

جارێک وەرن

بابکەین باسی خەمی دڵ

ڕۆژ ی شادیمان

بەڕێکرد

بێ هیوا بوو ئەمرازی دڵ

هێشووم وەری بەڵام هێشتا

لە لێوارە تاسەی حەسرەت

وەك چرایەک لە یادمە

لاوی چوانی گەنم ڕەنگ

چۆن بێ باکی دیدەنیت  بووم

خۆزگە  چاوم تۆی  نەدیایە

 

لەسەرو بەندی روداوەكانی ئەم دواییەداو لەگەڵ هێرشە دڕندەكانی داعش بۆ سەر شارو شارۆچكەو گوندەكانی ناوچە كوردنشینەكان و ناوچەكانی دەرەوەی هەرێمی كوردستان .. قسەو باسی ئێجگار زۆر لەسەر میدیای كوردی كراوەو دەكرێت، لە زۆر شوێن ناهەقی دەرهەق بە میدیا دەكرێت، لە زۆر شوێنیش هەندێك لە میدیاكان بەدەر لە هەستی نەتەوایەتی و كوردایەتی لە ژێر بڕو بیانوی بێلایەنی و ستراتیژی كەناڵ، ئەركی خۆیان لە روی ئیتیك و كاركردنی كوردانەوە خستۆتە ژێر پرسیاری قورس و نەبوردراوەوە.. هەندێك لەم كەناڵانە بەبێ‌ گوێدانە بەرپرسیارێتی سەرشانیان و هەستیاری قۆناغەكەو ترسناكی لایەنی بەرامبەر كە (داعش)ە، ئەو بەیاننامەو رێنمایی و راسپاردانەیان پشتگوێ‌ خست كە لەلایەن سەرۆكایەتی هەرێمی كوردستان و راسپاردەكانی پەرلەمانی كوردستان و رێنماییەكانی سەندیكای رۆژنامەنووسانی كوردستانەوە لەسەر بارودۆخی هەرێم و رەفتاری میدیاكارانەوە بڵاوكرابوونەوە..

 

بەداخەوە دەڵێین تا ئەمرۆش هەندێك لە كەناڵەكان رێز لە شەهیدەكان ناگرن و بە زاراوەی قوربانی و گیان لەدەستدان و چەندین وشەی داتاشراوی تر گوزارشت لە پێشمەرگەی شەهید دەكەن و لە هەندێك كەناڵیش هەواڵ و راپۆرتی هەڵبەستراو بڵاودەكەنەوە كە سەرلەبەری گیانفیدایی هێزەكان و خۆبەخشینی هەرێم و پارچەكانی تری كوردستان مایەپوچ دەكەنەوە، هەندێك كەناڵی تریش نهێنی سەربازی و جۆری چەك و جوڵەی هێزەكان بەجۆرێك بڵاودەكەنەوە كە دەبێتە مایەی سود بۆ دوژمن و مایەی زیان بۆ سەرجەم هێزە چەكدارەكانمان كە لە شەری سەروماڵی بەرگریدان چ لە باشوری وڵات یان لە رۆژئاوا، ئەمەش بوە مایەی نیگەرانی شەقامی كوردی لە هەر چوارپارچەی كوردستان و گوێ‌ نەدان بەو بانگەوازەی كە سەندیكای رۆژنامەنووسانی كوردستان و (IFJ) لە بەرواری (16)ی حوزەیرانی (2014) بڵاویان كردەوە..

 

بۆ رێگرتن لەم پێشێلكاریەی بەرامبەر بە ئیتیكی رۆژنامەوانی دەكرێت و بەهەند وەرنەگرتنی بیرو هەستی كوردانەو نەتەوایەتی، وا ئێمە جارێكی تریش لە سەندیكای رۆژنامەنووسانی كوردستان رووی دەممان دەكەینە سەرجەم خوشك و برا رۆژنامەنووسەكانمان لە كەناڵەكانی بینراو بیستراو خوێنراو ئەلكترۆنی و داوایان لێ دەكەین پابەند بن بەو رێنمایی و پرنسیپە جیهانیانەی كە كاری رۆژنامەوانی دەكەنە زانست و كاری راستەقینەی میدیایی لەسەر بنیات دەنرێت.

 

سەلامەتی بۆ سەرجەم رۆژنامەنوسان و سەركەوتن بۆ كوردستان

 

18/8/2014

 

سەندیكای رۆژنامەنووسانی كوردستان

 

https://www.facebook.com/sulaymaniy.sandika?ref=hl

 

 

ئەوەی پێشمەرگە لەشەنگال و موسڵ نیشانیدا ترسنۆكترین رەفتارە لەمێژووی كورددا

 

پێشمەرگەی دێرین و نووسەر و شاعیرێكی دیار"هەندرێن"، لە هەڤپەیڤینێكی"رۆژی وڵات"دا رووداوەكانی كوردستان لەپەیوەندی بەهێرشەكانی گروپی تیرۆریستی داعش و بەرگریەكانی گەل هەڵدەسەنگێنێت. هەندرێن دەڵێ:"ئەوەی ئێستا روودەدا، ئاكامێكە لەو مۆدیلە سیاسی و ئابوورییەی كە حكومەتی هەرێمی كوردستان هەڵگریەتی. ئەمەش نە راڤەیەكی تیۆرییە بۆ ئەو رەوشە و نە خەیاڵاندن، بەڵكو واقیعی ژیانی حكومەت و كۆمەڵگەی باشوورە"، ئەوەش دەڵێت:"داعش هێزێك نییە بتوانرێت بە گفتوگۆ رووبەڕووی ببیتەوە؛ بەڵكو دەبێ بە ئایۆلۆژیایەك رووبەڕووی ببیتەوە". هەرچی هەندرێن هەوارمیە پێ وایە كە:"بۆ رووبەرووبوونەوەی داعشیش دەكرێ سوود لە ئەزموونی هەپەگە و یەپەگە وەربگیردرێت؛ چونكە ئەمڕۆ تاكە هێزێكی سەربازیی خاوەن پرنسیپ و ئێتیكی نیشتمانیە كە كورد هەیبێ، ئەو دوو هیزەن".

 

ئا/ رۆژ ئەحمەد

 

* بە بۆچونی ئێوە گروپی توندڕەوی داعش(دەوڵەتی ئیسلامی) چما توندترین هێرش دەكەنە سەر گەلی كوردە لە ناوچەكەدا؟.

ـ داعش گرووپێكی دڕندەیە، پێكهاتەیە لە وەحشیترین هێزی ئیسلامی سیاسی، كۆنە بەعسی، پان ـ عەرەبیزم و ئەو موسڵمانانەی كە بڕوایان بە شەرع و خەلەفەتی ئیسلامی هەیە، تێكەڵییەكە لە كۆی ئەو كەسانەی كە لەماوەی پەنجا ساڵی رابردوودا لە ژێر دەستەڵاتی حكومەتە دیكتاتۆرەكان لەجیهانی ئیسلامدا سووكایەتیان پێكراوە. هەروەك بریتیە لەو خەڵكانەی كە لەدۆخی بە جیهانیبوون و هەژموونی سەرمایەداریدا هەست بە بوغز و پەراوێزبوون دەكەن. گەندەڵیی و تایفەگەریی حكومەتی ئێراق رێگە خۆشكەربوون بۆ بە هێزبوونی داعش لە ئێراقدا، بۆیە سوپای ئێراق هاوكاربوو لە گرتنی موسڵ و ناوچە سوننیەكان. بە كورتی داعش، پشكۆی ژێر خۆڵەمێشی كۆمەڵگەی دەمكوتكراوی حكومەتە دیكتاتۆرییەكانی دونیای ئیسلامە. كەواتە لەبنەڕەتدا جەوهەری داعش موسڵمانە بێمۆرالترین هێزە تووندڕو و دڕندەكانی جیهانی ئیسلامن، بەڵام تووندتر بوونیان بەرانبەر كورد، پەیوەندی بە كۆی ئەو دیدە بەد و شوومەی كە لەتەواوی مێژووی كۆمەڵگەی عەرەبی و توركی و... تاد بەرانبەر كوردا هەیانە، هەیە.

دیاردەی داعش، جا هەر هێز و لایەنێك لەپشتەوەی سازكردنی بن، لە دۆخی جیهانگریی و پۆستناسیۆنالیزمی عەرەبییدا، لە فۆرمێكی ئیسلامیدا. نوێنەری پان ـ عەرەبیزم و شۆڤینیزمی جیهانی موسڵمانەكان و دووبارەبوونەوەی بەشێكی گرنگی مێژووی ئیسلامە دەكا. بۆیە لەروانگەی داعشەوە كورد بە گشتی و بە تایبەتیش پارتە كوردییەكان عەلەمانین، "مرتد"ن، بۆیە كوشتن، تاڵانكردن و مەحفكردنەوەی كورد، بەشێكە لە "جیهاد".

 

* ساڵێك زیاترە شەرڤانانی كورد لەرۆژئاوای كوردستان هۆشداری دەدەنە باشوری كوردستان كە داعش مەترسیە بۆسەر كورد و هاوڵاتیانی ناوچەكە و یەكێتی نەتەوەیی پێویستیە، بەڵام هیچ هێزێكی دیكەی كورد، بەحكومەتی هەرێمی كوردستانیشەوە، ئەم هۆشدارییەی بەهەند وەرنەگرت، هێزەكانی سنوری هەرێم لەبەری وەڵامدانەوە زیاتر گەمارۆ و ئابڵوقەیان خستە سەر رۆژئاوای كوردستان، بە بڕوای ئێوە بۆچی؟.

ـ راستە نەك بەبڕوای من؛ بەڵكو بە بڕوای زۆرێك لە نووسەر و سیاسەتوانی رۆژئاوایی و جیهانیشدا، سەرسەخترین هێزێك كە توانیبێت و بتوانێت شەڕی قارەمانانەی داعش بكات، شەڕڤانەكانی یەپەگەن. ئەمڕۆ بە دیار ئەو دۆخەی مۆلەقەماندا بەرانبەر داعش، شەڕڤەكانی كورد لەخۆرئاوادا ئەوەیان سەلماند كە داعش مەترسییە بۆ سەر سەروەریی كوردستان، بەڵام مخابن حیزب و هێزەكانی تر لەبەشەكانی تری كوردستاندا، بە تایبەتیش حكومەتی هەرێمی كوردستان نەك هەنگاویان نەناوە، بەڵكو بە رێگەی ئابلۆقە و سنوور داخستنەوە تەگەرەشییان بۆ شەڕڤانەكانی كورد لەخۆرئاوا دروستكردووە، ئەمەش دیسان دووبارە بوونەوەی مێژوو و دووبەرەكی كوردە. نەبوونی ئەو یەكێتییە نەتەوەییە و ئابڵۆقە خستنە سەر رۆژئاوای كوردستان هۆكاری زۆرە، لێرەدا بوارمان نەبێت بە درێژی باسییان بكەین، بەڵام بە كورتی هۆكارە سەرەكییەكەی نەبوونی ویست و ئیرادەی یەكێتی نەتەوەیی، گوتاری نەتەوایەتییە لە لایەن حكومەتی هەرێمی كوردستان و بگرە زۆرینەی هاوڵاتیانی كوردستانە. لەئاكامی ئەوەدا لەبڕی ئەو یەكێتی نەتەوەییە، دووبەرەكی حیزبی. پاوانخوازیی حیزبی، بەرژەوەندی حیزبی و ئابوورییان هەڵبژارد. ئەوەی راستی بێت، دەبوو حكومەتی هەرێمی كوردستان و ‌ئەو رێكخراو و گروپە سیاسی و رووناكبیرانەی كە خۆیان بە سەربەخۆ دەزانن دەستپێشخەری ئەو ئەركە، پرۆژەی یەكێتی نەتەوایەتییە بن، لێ بەڵگەنەویستە سیاسەتی حكومەتی هەرێمی كوردستان پرۆژەی ئابووری، بازرگانی كردن، بە ئەركی سەرەكی خۆی داناوە. هاوكاتیش هیچ یەك لەهێزە جیاوازەكانی تر، نەك هەر ئەو غەمەیان بە ئەركی خۆیان نەزانیوە، بەڵكو هەڵگری هەمان پرۆژی ئابوورین.

دیارە ئەو دووبەرەكیی و پاوانخوازییەی حیزبەكان رابردوویەكی دووری هەیە و بۆتە نەریت و گوتارێك هەمیشە خۆیان بەرهەمدەهێننەوە، هەر ئێستا لە كاتێكدا ئاییندەی كورد لە بەردەم هەڕەشەی داعشدایە، كە چی رق و كێنە و ململانێی نێوان حیزبەكان لەپەرەسەندن دان. باشووری كوردستان، لەدوای رووخانی سەدامەوە، تووشی وەهێمك بوو كە چیتر كوردستان لەژێر هەڕەشەدا نەماوەتەوە، بۆیە بە دوبەیكردنی كوردستان، بازاڕخوازیی بوو بە خەونی سەرەكی حكومەتی هەرێم. بەمجۆرە بازاڕ و قازانجی هەمیشە، پارەخوازیی بوو بە ئامانجی سەرەكی هێز و هاووڵاتیانی كوردستان. ئەو بە ئابووریكردنە هەرچی بەهای نیشتمان و مێژووی كوردە تاڵانكرد. ئەو بە بازاڕكردنە بێئەخلاقی كرد بەئەخلاق، ساختەكاری كرد بە راستی؛ كۆی ژیان بوو بە كاڵا و پارە. لەوەش بترازێ، پەیوەندی بازرگانی حكومەتی هەرێمی كوردستان لەگەڵ توركیا و ئێران، هەر لەئاستی بەرژەوەندی ئابووریی نەمایەوە؛ بەڵكو بوو بە بازرگانی نەوت و بەرژەوەندی سیاسیش. لەئاكامی ئەمەشدا ئەو دەوڵەتە دوژمنە مێژوویانەی كورد، هەر تەنێ كۆمەڵگە و حكومەتی كوردستانیان نەكرد بە كاڵاخۆر و بەرخۆری بازاڕەكانی خۆیان، بەڵكو توانیشیان بوونی ئێرادە و رۆحی ئەو یەكێتییە نەتەوەییە بێمانا و تاڵان بكەن.

لێرەوە كاتێك لەكۆمەڵگەیەكدا ژیان لەبازاڕ و بازرگانی كورتبكرێتەوە، ئیتر نیشتمان و نەتەوە مانایەكی نامێنێت؛ چونكە ئاشكرایە جەوهەری بازرگانی، قازانجی هەمیشەیە. ئەوەی كە ئێستا روودەدا، ئاكامێكە لەو مۆدیلە سیاسی و ئابوورییەی كە حكومەتی هەرێمی كوردستان هەڵگریەتی. ئەمەش نە راڤەیەكی تیۆرییە بۆ ئەو رەوشە و نە خەیاڵاندن، بەڵكو واقیعی ژیانی حكومەت و كۆمەڵگەی باشوورە.

وێڕای ئەمەش، ئەوە مانای ئەوە نییە حیزبەكانی تر لەبەشەكانی تری كوردستان لەنەبوونی ئەو یەكیتییە نەتەوەییە بەشدار نین. دیارە گوتمان حكومەتی هەرێمی كوردستان بە هۆی ئەوەی دام و دەزگا و دەستەڵاتی هەیە، دەبوو دەستپێشخەری ئەو پرۆژەیە بێت، لێ دەكرێ پەكەكە و پەیەدە و هێزەكانی تری كوردستانی رۆژهەڵات، پێكەوە ئەو ئەركە ئێتیكیە نشتیمانییە بە هی خۆیان بزانن. ئەڵبەت لەدوای شكانی پێشمەرگە لەشەنگال، لە رووی سەربازییەوە هەپەگە و یەپەگە ئەو ئەركەیان راپەڕاندووە. ئەوە بە كردەیەكی گەورە، توانیوویانە مێژووی كۆمەڵگاكانیان وەربچەرخێنن.

وەك دەزانین، پەیوەندی نێوان ئەو هێزانە لەگەڵ یەكتر لەپەیوەندی نیوان حكومەتی هەرێمی كوردستان و هێزەكانی باكور و خۆرئاوادا باشتر نییە. بە كورتی كورد وێڕای ئەو هەموو هەژەندەی كە تووشی بووە، كەچی هێشتا لە قۆناغی عەقڵی خێڵ و حیزبخوازیدا تێداماوە و گیریخواردوە. بۆیە ئەو بەزینەی پارتی لەبەرانبەر داعشدا، وێڕای ئەوەی كە دڵخۆش بوون بەو شكستە هیچ لەو كۆستەی كە بەسەر كوردستان و بە تایبەتیش ئێزدییەكاندا هات، كەمناكاتەوە، لێ ئەو دۆخە بەرهەمی ئەو عەقلە خێڵەكیی و حیزبخوازییەیە كە هەر ئەمانەیە ئیرادەی یەكێتی نەتەوەییان ئیفلیج كردووە. دواجار، ئەمڕۆ ئەو هێزە شكۆی مێژوویی دەستبەر دەكا، كە بتوانێت ئەو پەرتەوازەیی و تێدامانەی كورد وەربچەرخێنێت و هێزێكی نیشتمانی دروستبكا، تا هەرنا لەم دۆخەدا بەرگریی لە هاوڵاتیانی كوردستان بكا.

 

* مانگێك لەمەوبەر هاتنی داعش بۆ موسڵ، هێزەكانی پێشمەرگە وەك "هێزێكی ئامادەی سەركەوتوو" لە میدیاكانی جیهاندا ناسێنران، بەڵام چۆڵكردنی شەنگال و ناوچەكانی دەوروبەری و گەشتنی شەڕ هەتاوەكو ناوچەكانی گوێر كە بە "٤٠" كیلۆمەتر لە هەولێر دوورە، تەواو پێچەوانەی ئەمە شرۆڤە دەكات، ئەم دەرئەنجامە هاوپێچەوانەیە بۆچی دەگەڕێننەوە؟

ـ ئەو شكستە نەك هەر بوو بە هۆی تراژیدیایەك بۆ ئێزدییەكان و هاوڵاتیانی ئەو دەڤەرە؛ بەڵكو ئەو وێنە پاڵەوانییەی كە بۆ پێشمەرگە نیشاندەدرا هەڵوەشاندەوە. ئەمەش بە درەنگییەوە دەریخست ئەو ئاسایشەی كە لە كوردستاندا شانازی پێوە دەكرا شاشی و كەم و كوڕی زۆری تێدایە.

ئەو راكردنە نیشانیدا كە هێزی پیشمەرگە هیچ خۆئامادەكردنێكی بۆ ئەو ئەگەرە نەكردووە. داعش دژی كوردە، بۆیە خۆئامادەنەكردنی پێشمەرگە بۆ هێرشی داعش، مانای "نائامادەیی" پێشمەرگەیە. وەك من تێدەگەم، راستە بەشێكی زۆری پێشمەرگە ئامادەیی شەڕی هەیە، لێ چونكە بوون بە پێشمەرگە، بوو بە بەشێك لەو كاسبیی و مووچەخۆرییە بە خۆڕاییەی كە لە كوردستاندا بوو بە باو، چاوەڕوانكراو نەبوو. كەواتە كە بوون بە پێشمەرگە وەك كاسبییەك سازكرابێت، بە دڵنیاییەوە ئەگەر ئەو شكستەی كە لەشەنگالیش تووشی بوو رووی نەدابووایە، بەڵام هەردەبوو ئەوە رووبدات؛ چونكە كاتێك پرنسیپ لە كۆمەڵگەیەكدا نەما، ئیتر هیچ تشتێك بایەخی نامێنێت، مرۆڤ دادڕمێت. كوردستانێك كە بە دوژمنی سەرسەخت گەمارۆدراوە، بەر لەهەموو كارێك دەبێ پێشمەرگە بە مۆرال و پرنسیپی نیشتمانی پەروەردە بكرێت. هەروایە و هێزی پێشمەرگەیە پیویستی بە مەشقكردن، بە ئیرادە، بە پڕچەكی باش و بە ئیرادەیەكی نیشتیمانی گۆشكراو هەیە. ئەو دەرئەنجامە ئەوەی پێ گوتین كە ئەگەر ئەو بە بەرخۆرییكردنەی كە لە كوردستاندا بوو بە سیستەم لە دەزگەكانی تر بە تەقە تەقیش بێت بەڕێوە بچێت، لێ لەبواری هێزی پیشمەرگەدا ئەوە سەرناگرێت. ئابووری نەك هەر ناتوانێت ئەخلاق و ئێتیكی نیشتمانیی بكرێت؛ بەڵكو تاڵانیشی دەكا!!.

كەواتە لە راستی لانادەین كە بێژین، ئەو دەرئەنجامەی كە هێزی پێشمەرگە نیشانی داین، وێڕای هۆكاری دەرەكیی و سیاسی ناوەكی، پەیوەندی بەوە هەیە كە جەوهەری هێزی پێشمەرگە بریتیە لەبەشێك لەو مشخۆرییەی كە سیاسەتی بە ئابووریكردن لە كوردستاندا بەرهەمیهێناوە. بۆیە نە بەرپرسەكانی پێشمەرگە لە دەڤەری شەنگال هەڵگری ئەو ئەركەن و نە بەشی زۆری پێشمەرگەكانیش، پێشمەرگە بوون.

مرۆڤ كە بۆ دەستكەوتنی پارە پێشمەرگایەتی وەك ئاسانترین كاسبی هەڵبژێرێت، سافیلكەییە چاوەڕێی بەرگریی و ئەركی نیشتمانیی لێبكەیت. پێشمەرگایەتی گەرەكە ئێتیك بێت، نەك بەشێك لەو كاسبیە تاڵانكاریەی كە لەكوردستاندا بوو دیاردە. لەوەش بگەڕێ؛ چونكە ئەو دەزگایەی پێشمەرگە بە بەرنامەیەكی ستراتیژیی نیشتمانیی سەیر نەكراوە، بۆیە نەبوونی مووچە، نەبوونی بەهای ئەخلاقی نیشتیمانی ... تاد وایكرد كە ئەو هێزە لە جەنگێكی وادا هەست بە بەرپرسیاری ئێتیكی خۆی نەكات. هاوكاتیش لەكوردستان یەك هێزی پێشمەرگە نییە؛ بەڵكو چەندین هێزی پێشمەرگە هەن؛ هەر حیزب و بەرپرسێكی ئەو حیزب و ئەم حیزب، خاوەن فەوج و لیوای پێشمەرگەی خۆیانن. وەك دەبینین ئەوە مانگێكە لە دەڤەری كەركوك و جەلەولا پێشمەرگە لەگەڵ داعشدا دەجەنگێ و كەچی، وەك ئەو هێزی پێشمەرگانەی كە لەشەنگال شكان، نەك هەر نەشكاون؛ بەڵكو زۆر شوێنیشی لەدەست داعشدا رزگار كردووە.

 

* چۆڵكردنی ناوچەیەك بەبێ بەرگری و جێهێشتنی قەدەری ژیانی سەدان هەزار خەڵكی سیڤیل لەدەستی هێزێكی توندڕەودا كە سنوری بۆ كوشتن نیە وەك داعش، كە پێشمەرگە لە شەنگال كردی و سەدان هەزار مرۆڤی بێتاوان ئاوارە بوون و دەیانیان گیانیان لەدەستداوە بەهۆی نەبونی خواردن و ئاو لەچیاكانی شەنگال، تا چەند بابەتەێكە مۆرال وبەرپرسیارێتی و ئیتیكی حكومەت و هێزێكی سەربازی دەكرێت بخاتە ژێر پرسیارەوە؟

ـ ئەوەی ناسنامەی هێزی سەربازیی یان پێشمەرگەی وڵاتیك یان حكومەتێك دیاریدەكا، ئێتیكی بەرگرییكردنە لە كەرامەت، ژیان و سەروەریی هاووڵاتیان و خاك و وڵاتەكەی. كەواتە كاتێك هێزی پێشمەرگە لە دۆخێكی گوماناوییدا دوای رۆژێك كەم یان زیاتر لە شەڕدا، بێ ئەوەی هاوڵاتیانی دەڤەری شەنگال ئاگادار بكاتەوە، هەڵبێ و خاك و خەڵكی مەدەنی، بە تایبەتی ژیانی ئێزدییەكان رادەستی داعش بكا كە تاڵانكردن و بە كەنیزەكردنی كیژەكانیان بە جیهاد بزانێت، وێڕای هەر پاساوێك، نەك هەر خیانەتی لەئەركی خۆی كرد؛ بەڵكو ئێتیك و ئەخلاقی خۆیشی رادەستی داعش كرد. هەر هێزێكی سەربازیی كە بەوجۆرە بوێری بەرەنگاری دوژمن و راپەڕاندنی ئەركە ئێتیكییەكەی نەبێت، گەرەكە ئەو خەسڵەتە ئێتیكییەی لێوەربگیردرێتەوە.

ئەوەی كە هێزی پێشمەرگە لە دەڤەری شەنگال و موسڵ نیشانیدا، رەنگە، ئەوەندەی من بیزانم، ترسنۆكترین و بێئەخلاقترین رەفتارە كە لەمێژووی كورددا، پێشمەرگە كردبێتی. دوای ئەو پێشهاتە تراژیدییەی كە بەسەر ئێزدییەكاندا هات، خەلكی كوردستان، ئەگەر سەروەری خاك و هاوڵاتییەكانی خۆیان بۆ گرنگ بێت، دەبێ داوای لێپێچینەوە لە وەزارەتی پێشمەرگە بكەن كە سزای كۆی ئەو پرسانەی پێشمەرگە بدەن كە بەرپرس بوون لەو دەڤەرەدا. ئەو كارەی هێزی پێشمەرگە بەر لەوەی ریسواكردنی خۆیی و ئێزیدییەكان بێت، سووكردنی مێژووی پێشمەرگە و وەزارەتی پێشمەرگەشە. هێزێكی وەك پێشمەرگە ئەگەر ئەخلاقی بەرگری نەبێت لەخاك و خەڵكی وڵاتەكەی، كەواتە هێزێكە ئەخلاقیش وەك كاڵا بۆ بازرگانی بەكار دەهێنێت، بەڵام دۆخی پێشمەرگە بەدەر نییە لە كۆی ئەو ژیانی سیاسی و كۆمەڵگەی كوردستان. بۆیە دوای ئەو پێشهاتە ئەوەی كە دەبێت بخرێتە ژێر پرسیاری ئێتیكییەوە. ئەو شكستە ئەخلاقییە هەر تەنێ هێزی پێشمەرگە و حكومەت ناگرێتەوە؛ بەڵكو كۆی خەڵكیشە؛ چونكە مەرگ و كەرامەتی ئێزدییەكان و خاك، پەیوەندی بە ئەخلاقی كۆی كۆمەڵگەی كوردستانەوە هەیە، بەڵام لە كۆمەڵگەیەكدا كە مۆرال و ئێتیكی نیشتمانیی، مرۆڤ و ژیان ببێتە كاڵا و كاسبی، كێ ئەو هێزی پێشمەرگە و بەرپرسیارانە بخاتە ژێر پرسیار؟!.

 

* داعش بە ئایدیۆلۆژیایەكی توندڕەو خوێنی خەڵك زۆر بەسانایی دەڕژێت و بەندەكانی ئەو بیروباوەرە تەكفیریە توندڕەوەی خۆشیان دەستبەجێ پیادە دەكەن لەهەرشوێنێك پێیدەگەن، كە زۆرجار لە سەربڕینی خەڵكدا هەوێنی ئەوتوندڕەویە بەناو ئیسلامیە ئاشكرا دەبینرێت. لەبەرامبەردا، بۆ بەرگریكردن لە هێرشەكانیان. تا چەند ئایدیۆلۆژیا گرنگە. یان بڵێێن، شەڕی دژە داعشدەكرێت تەنیا بە چەك سەربكەوێت بەبێ هەبونی ئایدیۆلۆژیا؟.

ـ دیارە ئەوەی كە وادەكا داعش بەو شێوەیە دڕندەیە خەڵك بكوژێت و موسڵمانەكانیش لە هەموو گۆشەكانی جیهانی ئیسلامەوە بێن بۆ سوریا و ئێراق و شەڕ بكەن، هەبوونی سەرچاوەیەكی ئایدیۆلۆژییە، كە داعش لەشەرع و ئایەت و قورئاندا وەریدەگرێت. ئەگەر داعش خۆی بە هەڵگری پەیامێكی ئیسلامی نەبێت، ناتوانێت بەوجۆرە شەڕ بكات. مرۆڤ كە شەڕ دەكا، تەنێ مەرگی تێدایە، ئەگەر پەیامێكی ئایینیی یان نەتەوەیی یان ئایدیۆلۆژییەكی لە پشتەوە نەبێت نایكات. داعش بە ئایدیۆلۆژیی ئیسلامییەوە ئەو شەڕە دەكا، كە خەونێكی هەمیشەیی موسڵمانەكانە. ئەو خەونەش دامەزراندی خەلافەتی ئیسلامییە.

داعش هێزێك نییە بتوانرێت بە گفتوگۆ رووبەڕووی ببیتەوە؛ بەڵكو دەبێ بە ئایۆلۆژیایەك رووبەڕووی ببیتەوە. هەڵاتنی سوپای ئێراق بەو هەموو هێز و چەكەوە لەموسڵ لەبەردەم داعشدا، ئەوەمان بۆ دووپاتدەكاتەوە كە ئەو هێزەی هەڵگری ئایدیۆلۆژیایەك نەبێت، وەك سوپای ئێراق ناتوانێت دژی داعش شەڕ بكات.

لە بەرانبەر ئەوەشدا، شەڕی یەپەگە، كە تەنیا مۆراڵی نیشتمانیی هێزی سەرەكییەتی، بەرانبەر هێزێكی دڕندە و پڕچەكی وەك داعش لەماوەی ساڵێكدا، نەك هەر داكۆكی لەخاك و خەڵكی خۆی كرد؛ بەڵكو داعشیشی تێكشكاند. كەواتە ئەوە راستییە كە تەنیا بە بوونی چەكی قوڕس ناتوانرێت رووبەڕووی دڕندەیی داعش ببییەوە؛ بەڵكو دەبێ ئایدیۆلۆژیی و ئێتێكێكی نیشتمانیش بین، تا شەڕی داعش بكەین. هەموو بەرەنگاری نەتەوە داگیركراوەكان لەجیهاندا ئەوەی سەلماندووە كە ئەوە ئامانج و ئەخلاقی نیشتیمانییە وادەكا شەڕی هێزە بەهێزەكانی داگیركاری بكەن. هەروەك لەكاتێكدا كە هێزی پیشمەرگە لەیەپەگە خاوەن چەكی باشتر و هێزی زیاتر بوو كە چی نەیتوانی دوو رۆژ لەبەرانبەر داعش شەڕ بكەن و خەڵك و خاكی دەڤەری شەنگال بپارێزێت، بەڵام هەر هێزەی كە ناوی پێشمەرگەیە لەهەشتاكاندا بە سادەترین چەك و كەمترین ژمارەی پێشمەرگە دەیتوانی لە گوندێكدا یان سەر شاخێكدا یان دەشتایەكدا باشترین بەرگری بكا.

 

* ڕێكخستنی جڤاك لەسەر بنەما فەلسەفیەكانی "بەرگری ڕەوا" تا چەند بە گرنگ دەبینن بۆ كورد و نەتەوەكانی دیكە لەناوچەكەدا لەبەرامبەر هێرشی ئەم جۆرە هێزانە؟.

ـ كورد ئێستا و رەنگە تا داهاتوویەكی درێژیش لەبەردەم هەڕەشەی هێزی دوژمن بێ. ئێستا، وێڕای هەڕەشە هەمیشەیی دەوڵە داگیركارەكان، داعش سەرەكیترین هەڕەشەیە لەسەر كورد و كوردستان. كەواتە نەبوونی پرنسیپی "بەرگری رەوا" وەك ئەركێكی سەرەكی و گرنگی نیشتمانی لەلایەن كۆمەڵگەی كوردستان و هێزە سیاسییەكانیدا، مانای قەبوڵكردنی كۆیلایەتی لای نەتەوەی كوردە؛ چونكە نەبوونی ئەو "برگرییە رەوا"یە، مانای نەبوونی كۆئاگایی و ئێتیكی نیشتمانییە لە لایەن نەتەوەی كوردەوە.

بۆیە ئەمڕۆ لە كاتێكدا كە كورد لەژێر هەڕەشەی هێزێكی بەربەری وەك داعشدایە، دامەزراندنی هێزێكی هاوبەشی نیشتمانی كە كۆی هێزەكانی كورد لەهەموو پارچەكانی كوردستان لەخۆیدا كۆبكاتەوە، سەرەكیترین ئەركی ئێتیكی نەتەوەییە. لەوەڵامەكانی پێشوودا ئاماژەم بەوە كرد، كە دوای ئەو تێكشكانەی پیشمەرگە لەشەنگال و مەخموور، پێویستە ئەو هێزە یەكگرتووە نیشتمانییە ساز بكرێت، كە لێژنەیەك لەپۆلێك گەریلا و پێشمەرگەی خاوەن ئەزموون و مۆرالی بەرز لەهەموو بەشەكانی كوردستاندا سەركردایەتی ئەو هێزە سەربازییە نیشتمانیە بكات.

دیارە بۆ ئەو كارەش دەكرێ سوود لە ئەزموونی هەپەگە و یەپەگە وەربگیردرێت؛ چونكە ئەمڕۆ تاكە هێزێكی سەربازیی خاوەن پرنسیپ و ئێتیكی نیشتمانیە كە كورد هەیبێت، ئەو دوو هیزەن. كۆی كوردیش ئەو راستییە دەزانن، كە هەپەگە و یەپەگە خودان مۆرالێكی نیشتمانیی و توانای سەربازیین.

ماوەی دەیان ساڵە هەپەگە خۆڕاگرانە شەڕ لەگەڵ هێزی ناتۆ، توركیا دەكا. هاوكاتیش ماوەی دوو ساڵە یەپەگە نیشانیدا بەو توانا و چەكە سادەیە بوێرترین "بەرگری رەوا" لەبەرانبەر داعش و دەوڵەتی سوریا دەكا. ئەڵبەتە پارتی كرێكارانی كوردستان دەمێكە دەسپێشخەری ئەو پرۆژە نەتەوەییەن، كە كورد پێویستی هێزێكی سەربازیی هەیە، تا "بەرگری رەوا" لەشكۆ و شەرەفی نەتەوەیی كورد بكا. هەر بۆیە هەپەگە دەیان ساڵە ئەو ئەركە نیشتمانییە رادەپەڕێنێت. لێ ئەوەی گرنگە دەبێ فەلسەفەی"بەرگری رەوا" دوور بێت لەحیزبخوازی و بەرژەوەندی و خۆسەپاندنی ئەم حیزب و ئەو حیزبە. مێژووی تاڵی كورد ئەوەمان پێدەڵێت كە نەبوونی ئیرادەی هاوبەشی نەتەوەیی، هۆكردی بەرچاوی مانەوەی كوردە لەو دۆخە كۆیلەییە. كەواتە، گەرەكە فەلسەفەی "بەرگری رەوا"، فەلسەفەیەكی سیاسی و كولتووری لەپشتەوە بێت. بە كەلتووركردنی مەیلی زانین و زانست لەژیانی كۆی كورددا. ئیرادەی هزراندنی"بەرگری رەوا" بەرگرتوو دەكا.

 

* یەكینەكانی پاراستنی گەل (یەپەگە) و یەكینەكانی پاراستنی ژن (یەپەژە) لەسەر ئاستی دنیا ئەمڕۆ وەك لەباشترین هێزەكانی بەرگری دژی داعش و هاوشێوەكانی دەناسرێن، بەوەی زۆرترین شكستیان بە هێزگەلێكی لەوشێوەیە هێناوە لەدوو ساڵی ڕابردوودا لەناو جەنگی ناوخۆ لە سوریادا، ئەم بەرگریە لەرۆژئاوای كوردستان كە دەكرێت و ژنانی كورد ڕۆڵێكی زۆر بەرچاوی تیادا دەگێڕن، چەندە گرنگی ئایدیۆلۆژیا و ژن پێكەوە دەردەخەن لەم شێوە بەرگریانە بۆ مانەوە لەبەرامبەر ئەو مەرگەی توندڕەوەكان لەگەڵ خۆیان دەیهێنن؟.

ـ بێ بوونی ئایدیۆلۆژی یان فەلسەفە و پرنسیپێك لەبزاڤێكی سیاسیی یان جڤاكیدا، ناكرێ ئەو ئیرادە هاوبەشە، ئەركە یەكسانیەی نێوان ژن و پیاو بەرجەستە بكرێتەوە. لەكۆمەڵگایەكی وەك كوردستاندا كە دوژمن هەمیشە هەوڵیداوە ئیرادەی تێكبشكێنێ و لەنەریتی كۆندا قەتیسی بكا ئەو فەلسەفەیە ئیرادەخوازەیە كە وایكردووە ژنی كورد لە باكور و خۆرئاوادا ئەو وەرچەخانە لەژیانی كۆمەڵگەی كورددا بسازێنێت و سەرنجی جیهانیش رابكێشێت.

ئەزموونی هەپەگە، یەپەگە و یەپەژە لەو چەند ساڵەدا توانی ناسنامەیەكی جیاواز بە كورد ببەخشێت. هەروەك ئەزموونی ژن لەباكور و خۆرئاوادا، ئەو وێنە ناشیرینەی كە كورد لەئەوروپادا وەك ژنكوژ سەیر دەكرا، سەرەو ژێر كردۆتەوە. بەر لەدوو ساڵ لەئەورۆپا لە مێدیایەكاندا تەنیا باس لەژنكۆژی لەباشور و كوردانی تاراوگە دەكرا، كەچی هەنووكە بە تایبەتی دوای ئامادەیی راشكاوانەی ژنی كورد شانبەشانی پیاو لە یەپەگە، وێنەی ژن و كۆمەڵگەی كورد بە پێچەوانەوە بۆتەوە. ئامادەیی و ئیرادەی ژنی كورد لەشەڕی داعش و داكۆكیكردن لەشكۆی نیشتمان و یەكسانی بۆ خەڵكی ئەورۆپا و بگرە رۆژهەڵاتیش لەشكۆی نیشتمان، بۆتە مایەی تێڕامان و باڵكێشی. كەواتە ئازادبوون و ئامادەیی ژنی كورد لەریزەكانی یەپەگە و هەپەگەدا، پەیوەندی بە ئامادەیی و كارایی ئەو ئایدیۆلۆژیا و فەلسەفەی ژیان و ژنەوە هەیە كە ئەو دوو هێزە هەڵگرینە. خاوەنی ئەو فەلسەفە ئیرادەبەخشەی ژن، عەبدوڵڵا ئۆجالانە. وێڕای هەر تێبینیی و رەخنەیەك لەو فەلسەفەیە، لێ لەمێژووی كورددا و بگرە ولاتانی ئیسلامدا، هیچ بزاڤێكی لەو جۆرە نەبووە و نییە.

 

* خوێندنەوەی ئێوە چییە بۆ هاتنی هێزەكانی یەپەگە و گەریلا بۆ ناوچەكانی رەبیعە و شەنگال و شەهیدبوونی ئەندامانیان لەبەرگریكردنی خەڵكی سیڤیل لەو ناوچانەی باشوری كوردستان، پێتان وایە ئەمە ببێتە سەرەتایەك یان وەرچەرخانیك بۆ یەكێتی نەتەوەیی كە لەرۆژئاوای كوردستانەوە دوو ساڵە بانگەوازی بۆ دەكرێت لەدژی داعش و داگیركەرانی كوردستان؟.

ـ ئامادەیی هێزەكانی یەپەگە و گەریلا بۆ ئەو دەڤەرانە، مۆرالی ئێزدییەكان و خەڵكی كوردستان و پێشمەرگەی تێكشكاو بەرزكردەوە. ئەمەش ئاماژەیەكی روونە كە یەكێتی نەتەوەیی ئەركێكی چەند گرنگە. هەروەك بانگەواز و دەستپێشخەری خۆرئاوای كوردستان چەند گرنگە. ئەمڕۆ كورد لەبەردەم هەڕەشەیەكی گەورەدایە، حكومەتی هەرێمی كوردستان، هەرچەندە پڕە لەحیكایەتی دوبەیی كە بەرهەمی بە خوێنی هەزاران قوربانیی مرۆیی، ئەنفال، سووتانی خاك، تاڵانكردنی ... كوردە، كە چی ئێستا لەشەو و رۆژێكدا لەژێر هەڕەشەی داعشدایە. بۆیە ئەركی كۆی هێز و حیزبەكانی كوردستانە لەهەموو بەشەكانی كوردستاندا، هێزێكی هاوبەشی یەكگرتوو، لەپێناوی داكۆكیكردن لەهاوچارەنووسی كورد دروستبكەن. حكومەتی هەرێمی كوردستان بە هۆی بوونی دەسەڵات و توانای ماددییدا بەرپرسی سەرەكی ئەو ئەركە مێژوویەیە.

هەنووكە كورد لەبەرچاوی جیهانەوە رووبەڕووی دڕەندەترین ‌هێزی ئیسلامی ـ پانعەرەبیزم بووەتەوە، بۆیە ئەو یەكێتیە نەتەوەیە سەرەكیترین ئەركی كوردە. ئەو كردە ئێتیكییە، یەكێتی نەتەوەییە تەنێ هاوچارەنووسی هەر چوارپارچەی كورد لەهەڕەشەی داعش و شۆڤینیزمی نەتەوە داگیركارەكاندا رزگار ناكا؛ بەڵكو ئەو گوتارە خێڵەكییە نەتەوەییە دواكەوتووە، حیزبخوازی، خۆخۆرییە رەگئاژۆییەش لەهەناوی كۆمەڵگەی كوردستاندا كۆتایی پێدەهێنێت. هاوكاتیش كاریگەریترین شێوازە كە زلهێزەكانی جیهان ناچار بكا كە پایەی كورد بەهەند وەربگرن. بەمەش لەم دۆخەدا كە تێرۆر و ئاژاوەی جیهانی ئیسلامی تەنیوەتەوە، كورد جیاواز لەخۆی نیشاندەدا. لەهەمانكاتدا ئەو یەكتێتیە نەتەوەییە، كورد لەوە رزگار دەكا كە هەمیشە چاوەڕوانی بەزەیی و پشتیوانی جیهان بێت.

بەستانەوەی كورد بە خێر و بەرەكەتی ئەمەریكا كە بۆ بەرژەوەندی خۆی بۆ ماوەیەك داعش بێهێز دەكا، كورد لەو هەژان و تەنگژە ئێتیكییە نەتەوەییە رزگار ناكا؛ چونكە ئەمریكا لەبەر بەرژەوەندی خۆی ئەوكارە دەكا، رەنگە لەماوەیەكی كورتدا بەرژەوەندی ئەمەریكا وابكا، جارێكیتر پشت لەكورد بكاتەوە. ئەوكاتە كورد دیسانەوە پەنا بۆ كوڕووزانەوە بەرانبەر بەختی خۆی دەباتەوە. هیوادارین ئەو كۆژانەی كە ئەمڕۆ هەڕەشە لەشكۆی كورد دەكا، ببێتە راسانێكی ئەخلاقی و بە راگەیاندنی هێزێكی بەرگریی یەكگرتوو گوتارێكی نیشتمانیی هاوسەردەم، بوونی كورد لە بێمێژوویی، دەرەوەی مێژوو كۆتا پێبهێنێ و رۆحی مێژوو بتەنێتەوە.

 

* ئەوەی لەباشوری كوردستان لەم چەند ساڵەی ڕابردوودا زۆر دیار بوون، توێژێكە بەناوی"روناكبیر و رۆشنبیر"، ئەم توێژە كە لەسەر هەموو بابەتێك باش و خراپ دەیگوت و دەینوسی، لەم ڕەوشەی ئێستا كورد تێكەوتوە بێدەنگترینن، وەك نوسەرێكی دیاری كورد لەناوە و دەرەوەی وڵات، بێدەنگی ئەم توێژە لەباشوری كوردستان چۆن شرۆڤە دەكەن؟

ـ "رووناكبیری" كورد، لەم رۆژگاری بە دوبەییكردنەی كوردستاندا، مشخۆرترین و فشۆڵترین توێژی كۆمەڵگەی كوردن. ئەو توێژە كاتی ئەوەیە رۆڵی خۆی بگێڕێت، لێ بە پێچەوانەوە ئەوەی نەیبێت بیركردنەوەیە، بۆیە بۆ ئەوەی لەتاریكدا خۆی مت و كپ دەكا، تا كەس نەیبینێت. ئەو توێژە یەكێكە لەتوێژە سوومەندەكانی ئەو مشەخۆری و داڕمانە ئەخلاقیەی كە لەكوردستاندا لەئارادایە. "رووناكبیر"ی كورد ئابووریی بە جۆرێك هاڕاندی كە نەك هەر بێدەنگە بەرانبەر ئەو رەوشە؛ بەڵكو ناخوازێ بشبینرێت؛ چونكە فێربوو وەك كوێخا خەریكی بەزمی رۆژانە و چاوەڕوانی خەڵات و بەخشیش بێت.

ئەو توێژە منداڵی دۆخێكە كە هی بە دەنگهاتن و ئێتیكی نیشتمانی نییە؛ بەڵكو منداڵی كۆكردنەوەی گوتراوەكانە تا لەپێناو كەڵەكردنی پارەدا ستوونە سوواو، كتێبە كڵۆڵەكەی پێ پڕ بكاتەوە.

دوای رووخانی رژێم كە پارە هەڵڕژا، حكومەتی هەرێمی كوردستان، حیزبەكان، هاوشێوەی بوارەكانی تر تا بەو رێگەیەوە خەڵك دامەزرێنن، دەستییان كرد بە كردنەوەی بنكە و دەزگە بێبنەما و ناڕێكخراوەكان و دەركردنی گۆڤار و رۆژنامە و... تاد بێ بێسەروبەر. بەمجۆرە هەرچی كەمێك خوێندەوارە بوو لەو بنكە و دەزگەیانە، بوون بە "رووناكبیر". ئیتر "رووناكبیر" لەكوردستان بە قەت كاڵایە ستۆك و ئێكسپایەرەكان بێژمار بوون. نەبوونی"سیاسەتی كەلتوری" لە حكومەتی هەرێمی كوردستاندا، ئەرك و رۆڵێكیش بۆ ئەو "رووناكبیر"ە مانای نەما. بە بازارگانیكردن، بە دوبەیكردنی كوردستان وایكرد هیچ مانایەك بۆ ئێتیكی رۆشنبیریی نەمێنێتەوە.

 

* زۆر سوپاس بۆ ئەو كاتەی تەرخانتان كرد بۆ ئەم دیمانەیە، ئەگەر شتێك مابێت لە دوا گوتە. ئێمە دووبارە سوپاستان دەكەین؟.

ـ سوپاس بۆ تۆ كە لەو دۆخە ئاڵۆزەدا بوارت رەخساند كە لەو گفتوگۆیەدا پێكەوە باس لەو دۆخە غەمگینە و باس لەقەدەری كورد بكەین. هیوادارین ئەو شكستە سیاسی، سەربازیی و ئەخلاقیەی حكومەتی هەرێمی كوردستان، ببێت بە وەرچەرخانێكی نەتەوەیی.

.............................

 

خالَ: بةداوةي ليَبوردنةوة بؤ مامؤستاي بةريَزمان، كاك هةندريَن، لةبةر ئةوةي لةكؤفارةكةدا بةهةلَةي ديزانيستةكةمان، لةشويَني ويَنةي بةريَزيان ويَنةيةكي هةندريَن هةورامي دانراوة، ئةمةش جيطةي كةم و كورِي ئيَمةية، بةهيواين هةم كاك هةندريَن و هةميش رؤذنامةوان رؤذ ئةحمةد و هةموو خويَنةراني هيَذا ليَمان ببوورن... جاريَكي تريش بةداواي ليَبوردنةوة...

 

 

سەرەرای ئەوەی لە سەنگەرەکانی شەڕدا پێشمەرگەکانی کوردستان و گەریلا و شەڕڤانانی باکوور و رۆژئاوای کوردستان لە پێناو پاراستنی کەڕامەتی مرۆڤی و خاکی نیشتیمان و هەرێمی کوردستان دا گیانی خۆیان لەسەر دەستیان داناوە، لە میدیا و پرۆپاگەندەکان، شەقامەکاندا و مانۆورە سیاسیەکاندا مەودای نێوان کوردان زیاتر دەبێت و شەڕە پەرۆی نەوەدەکان لە خەریکە لە گەڵ شەڕە ئاڵا جێگۆرکی دەکات.

 

لە هەفتەی رابردوودا لە کۆبوونەوەی کۆمیتەی هاوکاری هێزە سیاسیەکانی کوردستان و چەند رێکخراوی مەدەنی کورد لە وڵاتی فینلاند، بڕیار درا خۆپێشاندانێکی هاوبەش بە بەشداری هەموو کوردانی نیشتەجێی فینلاند بە مەبەستی ڕاکشانی سەرنج و پشتگیری بیرورای گشتی فینلاند بۆ ئاوارەکانی هێرشی تیرۆریستەکانی داعش بۆ سەر ناوچەی شەنگار و شوێنەکانی دیکەی کوردستان رێک بخرێت. هەموو لایەک هاوڕابوون لە سەر ئەوەی کە لە رێپێوانەکەدا هێمای هاوبەشی نەتەوایەتی واتە "ئاڵای کوردستان" وەک تەنیا بەهای هاوبەشی خۆپێشاندەران بێت.

 

لە هەمان کۆبوونەوەدا بڕیار درا چەند کەسێک لە گەڵ رێکخراوی پارتی کرێکارانی کوردستان گفتگۆ بکەن بۆ ئەوەی رێپێوانەکە هاوبەش بیت و  کوردی هەموو پارچەکانی کوردستان پێکەوە ئەو چالاکیە ئەنجام بدەن. یەکێک لە نیگەرانیەکانی کۆبوونەوە ئەوە بوو کە PKK نەچێتە ژێر ئاڵای کوردستان و ئاڵای خۆیان بێنن. بۆ حیزبێکی ئایدیۆلۆژیک کە ناتوانێ خۆی لە گەڵ دەوروبەر بگونجێت و تەنیا داوای گونجانی لایەنەکانی دیکە لە گەڵ خۆیان دەکات ئەمە نەشتێکی سەیرە و نەش نامۆ. هەرچۆنێک بێت دوای باس و گفتگۆ و راوێژی بەشداران بڕیار درا تەنانەت ئەگەر ئەوان بە ئاڵای خۆشیان بێن، وا باشە خۆپێشاندانەکە هاوبەش بێت.

 

دوای گفتگۆ لە گەڵ PKK و قبووڵ راگەیاندنی ئەوەی کە ئەوان "تەنیا بە سەمبۆل و ئاڵای خۆیانەوە"دێن بۆ رێپێوانەکە و  بڵاو بوونەوەی بانگەشەی خۆپێشاندان، راست یەک رۆژ بەرلە رێپێوانەکە جگە لە یەک لایەن هەموو ئەندامانی دیکەی کۆمیتەی هاوکاری هێزە سیاسیەکان بە بیانووی هاتنی PKK بە ئاڵای خۆیەوە پاشکشەیان لە بەشداری لە خۆپێشاندانەکە کرد.

 

ئاڵای کوردستان کە لە پەرلەمانی هەرێمی کوردستان پەسەند کراوە و لە لایەن نزیک بە هەموو هێزەکانی رۆژهەڵاتی کوردستانیش وەک ئاڵاو هێمای نەتەوایەتی دانی پێهێنراوە لە لایەن PKK و حیزب و رێکخراوەکانی سەر بەو حیزبەوە. کوردستان وڵاتێکی پارچەپارچە کراوە کە تا ئێستا نەیتوانیوە لە سەر بنەماکانی هاوبەشی نەتەوایەتی بگاتە پێکهاتنێکی یەکگرتوو. ئاڵای کوردستانیش یەکێک لەو پرسانەیە. کە لە کاتێکدا پەسەند کراوە کە کێشە و ململانێی PKK و حیزبەکانی باشووری کوردستان لە ئاستی هەرە بەرزی خۆیدا بوو و ئەو ئالایە لە لایەن PKKیەوە وەک هێژمۆنی پارتێکی سیاسی دیاری کراو بەتایبەت پارتی دێموکراتی کوردستان دەبیندرێت و ئاڵای PKKش لە لایەن حیزبەکانی دیکەوە بەهەق وەک سەرچاوەی هێژمۆنی خوازی PKK دەبیندرێت.

 

زیاتر لە بیست وڵاتی عەرەبی کە هەموویان خۆیان سەربە نەتەوەی گەورەی عەرەب دەزانن خاوەنی چەندین ئاڵاو حکوومەتی تایبەت بەخۆیانن. بەوحالەش لە سەر ئاڵا و ئەوە کە کامەیان ئاڵای نەتەوەی عەرەبە کێشەیان نیە. پارادۆکسی بزاڤی کوردستان لەوەدایە کە لەلایەک دەلێت دەبێت لە گەڵ رەوشی سیاسی و هەلومەرجی ناوخۆیی وڵاتان و ناوچەدا خۆمان بگونجێنین و لەلایەکی دیکەشەوە بەشێک لە حیزبەکان تەنیا ئاڵای پەسەندکراو لە لایەن حکوومەتی هەرێمەوە بە ئاڵای کوردستان دەزانن. ئەمەش هەمان هێژمۆنی خوازیەکە کە دوولایەنی پێوەندیدار بە ئالای کوردستان لە بەرامبەر یەکتر دادەنێت.

 

قبووڵ و دانپێنانی ئەوە کە کوردستان و تەنانەت هێمای نەتەوایەتی کورد لە بەشەکاندا و ناوهێنانی بەشەکان لە لایەن هێزە سیاسیەکانەوە لەوانەیە جیاواز بن، دەتوانێت هەنگاوێکی گرنگ بێت بۆ دانپێنان بە فرەچەشنی و پلۆرالیزمی بۆچوون لە پێوەندی لە گەڵ چارەسەری کێشەی نەتەوایەتی و سیاسیەکانی کوردستان. بزاڤی کورد لە دانپێنان بەو جیاوازیە و پێکەوە بوونی ئەو ئالایانە قازانجی زیاتر دەکات تا شەڕە ئاڵایەک کە دەبێتە هۆی لەبەرامبەر یەکتر دانانی ریزەکانی گەلی کورد دژی یەکتر. مەرجی گەیشتن بە یەکیەتی نەتەوایەتی دانپێنان و قبووڵی جیاوازیەکانە. هەلومەرجی ناسکێک کە کوردستان لە هەموو پارچەکانی خۆیدا تێپەر دەکات ئەوە لە حیزب و رێکخراوەکانی کوردستان دەخوازێت کە بەجیاتی دابەش بوون بە سەر بلۆکە جیاوازیەکانی سەر بنەمای بەرژەوەندی وڵاتانی داگیرکاری کوردستان و حکوومەتە تۆتالیتەرەکانی ناوچەدا ئەو فرەرەنگیە بکەنە هەوێنی دەوڵەمەندی سیاسی و کولتووری نەتەوایەتی بنەماکانی بەهاهاوبەشەکانی نەتەوایەتی پێک بێنن.

 

 

 

 


دوای ئەوەی لە 6ی ئاب وەک یەکەم لایەن بانگەوازی پێک هێنانی لیژنەیەکی باڵامان کرد بۆ بەجینۆسایدناسینی کۆمەڵکوژی ئێزیدییەکان و سزا دانی بکەرانی تاوانەکانی داعشمان کرد, چ لە سەر ئاستی حکومی و پەرلەمانی و مافی مرۆڤ  و رێکخراوی کۆمەڵگای مەدەنی و.....لەوکاتەوە  هەر یەکەیان بە جیا هەوڵیان خستۆتە گەڕ  ئەو مانجەئا , ئێمە وێڕای پێمان وایە هەنگاوەکان لە دڵسۆزییەوەیە  لێ ئەم بێسەرو بەرییە بە کارێکی خراپ دەزانین و پێمان وایە هەموو هەوڵەکان بە بەشداری نوێنەرانی قوربانیان و رێکخراوەکانی تایبەتمەند و وەزارەتی پیشمەرگە و ناوخۆ و .........یەک بخرێت  و کەڵک لە ئەزمونی شارەزایانی بیانی و ناوخۆیی و پارێزەرانی کەیسەکانی رابردووی کورد لە بەغدا وەربگرترێت و ژورێکی تاییبەتمەند سەر بە حکومەت بۆ ئەم مەبەستە پێک بهێنرێت, کە کەسایەتییەکی بەهێزی حکومەت سەرپەرشتی بکات.

 

 

 

 

 

گروپی تیرۆریست‌و ئینساکوژی داعش، کە دوای ناکامیی میحوەری ئەمریکا- تورکیا- سعودیە لە سوریادا، بۆ پێکهێنانی ئاڵوگۆڕ لە هاوسەنگی هێز لە ئاستی ناوچەکەدا، لەلایەن ئەم میحوەرەوە، جڵەوی گواستنەوەی جەنگەکەی بۆناو عێراق بۆ شل کرا، ماوەی نزیك بە دوومانگە بارودۆخی سیاسی عێراقی بە خۆیەوە سەرقاڵ کردوەو کۆمەڵگای مرۆڤایەتی بە ئەنجامدانی تاوانەکانی بەرامبەر بە هاوڵاتیانی مەدەنی ‌لە ناوچەکانی موسڵ‌و تکریت‌و کەرکوك، پیشتریش لە رومادی و فەلوجە، تووشی راچڵەکانیکی گەورە کردوە. کوشتنی بە کۆمەڵی خەڵك لەوپەڕی خوێن ساردیدا، نمایشکردنی لاشەی سەربڕاوی مرۆڤ‌، بە کۆیلەکردنی ژنان‌و سوکایەتی پێکردنیان‌و دەستدرێژی بۆسەر ژنان‌و کچانی سەر بە پەیڕەوانی ئاینەکانی غەیری ئیسلام‌و تائیفەی سونە! وێرانکردنی هەرچی سیمایەکی مەدەنی‌ کۆمەڵگا‌و داسەپاندنی یاساو حوکمی "خەلافەتی ئیسلامي" يان بەسەر هاوڵاتیانی ناوچەکانی ژێر دەسەلاتیاندا، کارنامەی ئەم دوو مانگەی ئەم رەوتە دڕندەو ئینساکوژە بووە لە عێراقدا. هێزێکی تاسەر مۆخ کۆنەپەرست‌، دژی ئازادی، دژی ژیان، دژی مەدەنیەت، دژی مرۆیی ‌ودڕندەی هەوسارپچڕاو، کەهاوشێوەی تالیبان‌و قاعیدە لە ناو هۆڵەکانی دەزگای سیخوڕی (CIA)ەوە توركياو قەتەرو سعودیە بۆ جێبەجێکردنی ستراتیژی‌و بەرژەوەندیەکانی ئیمپریالیزمی ئەمریکاو ئەم قوتبە ناوچەییە لە رۆژهەڵاتی ناوەڕاستدا دروستکراوەو بەردراوەتەوە گیانی خەڵکی بێدیفاع‌و مەدەنی سوریاو عێراق. داعش گروپێکی ئیسلامی سیاسی تيروريست و خوێنخۆرە کە خاوەنی ئایدیۆلۆژیایەکی ئیسلامی- تائیفی- نەتەوەپەرستی عەرەبیەو روو لەهەر شوێنێك بکات سڵ لەئەنجامدانی هیچ جۆرە تاوان‌و کۆمەڵکوژیەك دەرهەق بە هاوڵاتیانی مەدەنی ناکاتەوە. تاوانەکانی ئەم گروپە مرۆڤکوژە بەرامبەر بە هاوڵاتیانی مەسیحی، یەزیدی، ژنان، دیلەکان بەجۆرێك ترسناک‌و سەرسوڕهێنەرن کە لەلایەن مرۆڤایەتی ئەم سەردەمەوە مایەی راچڵەکین‌و نەفرەتی گەورەیە.

 

کێشمەکێش‌و شەرو بەدیلەکانی لایەن‌و میحوەرەکانی ئەو شەڕەی کە ئیستا لە نیوان داعش‌و هێزە دەسەڵاتدارەکانی عێراق‌و کوردستاندا لەئارادایە، هیچیان لەگەل ماف‌و ئازادی‌و بەرژەوەندیەکانی خەڵکی کرێکارو ئازادیخوازی عیراق‌و کوردستان نزیکایەتيان نیە. بەرژەوەندیی سیاسیی جەماوەری کرێکارو زەحمەتکێش‌و سەرجەم ئازادیخوازو یەکسانیخوازی عێراق‌و کوردستان، پێداویستی پاراستنی کۆمەڵگاو کەرامەت‌و ژیانی هاوڵاتیان لە تیاچوون، دابینبوونی ئارامی‌و گەشەی کۆمەڵایەتی، دابینوونی ئازادی‌و پێشکەوتن‌و گەشەی هیواو ئومێدەکانی ئینسان لە عێراق‌و کوردستان، پەرەدان بەگیانی هاوچارەنوسی‌و رێگرتن لە بڵاوبوونەوەی پەتای رەگەزپەرستی‌و تایفەگەری‌ لەناو دانیشتواندا، پاراستنی ژنان‌و مناڵان لە دەستدرێژی‌و سوکایەتی‌ پێکردن‌و بەکۆیلەکردنیان، سازکردنی زەمینەکانی گەشەو پێشڕەویی کۆمەڵایەتی- فەرهەنگی- زانستی لە کوردستان‌و عێراق، لە ئیستاداو بەر لەهەرشتێك بەستراوەتەوە بە پاکردنەوەی ئەم ئافاتە کوشندەیە کە ناوی داعشەو وەدەرنانیانە لەناو کۆمەڵگای عێراق‌‌. مانەوەی ئەم ڤایرۆسە مەترسیدارە لەهەر گۆشەو قوژبنێکی کۆمەڵگاداو لەهەر جێگایەك بێت، هەڕەشەی بەردەوامە بۆ سەر هەموو روخسارو بنەماو بەهایەکی ئینسانیی کۆمەڵگا‌. بۆیە هەرجۆرە سازاندنێکی بەرژەوەندی سیاسی یان ریگاخۆشکردنی سیاسی‌و سەربازی‌و تەنانەت لێنەبڕاوی لە دژایەتیکردنی ئەم تاقمە دڕەندەو ئینسانکوژە، پاساوو بەهانەکەی هەرچیەک بێت، تاوانێکی گەورەیە بەرامبەر بە خەڵکی عێراق‌و کوردستان، بازرگانیەکی سیاسی لەرادەبەدەر سووكە بەخوین‌و کەرامەت‌و ژیانی ئەم جەماوەرە بەرینەو بەشداریکردنە لە تاوانە وەحشیانەکانی داعشدا، بۆیە ریسواو شەرمەزارەو دەبێ بکەوێتە بەر نەفرەت‌و نارەزایەتی توندی خەڵکی عێراق‌و رای ئازادیخوازی دنیا. هەرجۆرە دوودڵی یان رێگاگرتنێك لە هەوڵدان بۆ وەدەرنان‌و تەفرتوناکردنی داعش‌ لەلایەن هەر هێزیکی سەر مەیدانی ساسی عیراق‌و کوردستانەوە بێت، بەڵگەیەکی ئاشکرایە بۆ ناکۆکی توندی ئەو هیزە لەگەڵ ئازادی و ئینسانیەت‌و سەرەتاییترین ماف‌و بەرژەوەندیەکان خەلک.

 

ئەمریکاو تورکیاو دەوڵەتانی هاوپەیمانیان گەورەترین تاوانیان بەرامبەر خەڵکی عێراق‌و کوردستان‌و ناوچەکە ئەنجامداوە بە دەرگاکردنەوەو هاندان‌و بەهێزکردنی ئەم گروپە تیرۆریستە بێهەوسارەی ئیسلامی سیاسی بۆ کوشتاری بەلێشاوی خەڵك‌و داڕمانی کۆمەلگا تەنها لەپێناوی بەرژەوەندیە حەقیرەکانی خۆیان. ئەمە ئەلقەیەکی دیکەیە لە زنجیرەی تاوانکاریە گەورەکانی ئەمریکاو هاوپەیمانەکانی وەکو تورکیاو سعودیەو قەتەر بەرامبەر خەلکی ئەم کۆمەلگایە. خەلکی عیراق‌و کوردستان نەک هەر نابێ هیچ خۆشباوەریەکیان بە درۆو دەلەسەکانی ئەمریکاو تورکیا هەبیت سەبارەت بە خەمخۆری‌و بەدەنگەوەهاتنیان بۆ مەرگەساتەکانی خەلکی ئەم کۆمەلگایە، بەڵکو دەبێ وەکو بەڵگەیەکی تری دژایەتی ئەوان لەگەل مرۆڤایەتی‌و ئامانجەکانی خەلکی ئەم کۆمەلگایە چاوی لێبکەن‌و خۆیان‌و دەستوپێوەندە ناوخۆییەکانیان ریسواو شەرمەزار بکەن.

 

ئەگەرچی هێرشە ئاسمانیەکانی ئەمریکا بۆسەر داعش (کە بەپێی ستراتیژی‌و بەرژەوەندی ئیمپریالیستیانەی خۆی ئەنجامی دەدات)و گرتنەوەی مەخمورو گوێر پێشڕەویەکانی داعشی لە ئاستێکدا راگرتوە، بەڵام ئەم ئاڵوگۆرە ناتوانێ خەڵك خاترجەم بکات‌و نابێ خەڵك ئومێدی پێوە گرێ بدەن و پشتێنی لێبکنەوەو دەبێ هێزی خۆیان بەرامبەر بە داعش‌و تیرۆریستانی ئینسانکوژ سازو ئامادەو کۆبکەنەوە. ئەو هێزەی کە دەتوانێ بێ دوودڵی‌و لێبڕاوانە بەرامبەر بەربەریەتی داعش رابوەستێت‌و زامنی بەرگری بیت لە ژیان‌و کەرامەت‌و مافی هاولاتیان‌و تەنانەت بەشێوەیەکی یەکجارەکی ئەم جانەوەرە ئیسانخۆرانە لە مەیدان بکاتە دەرەوەو تێکیبشکێنێ‌، هێزی جەماوەری رێکخراوو چەکداری خەڵکی کوردستان‌و عێراقە. جەماوەری کرێکارو زەحمەتکێش‌و ئازادیخواز دەتوانن هەر ماڵێك بکەن بە سەنگەرێك‌و هەر گەڕەکێك بکەنە بە بەرەیەکی بەرەنگاربوونەوەی داعش‌و سەرجەم تیرۆریستان‌و بستە خاکێك نەهێڵنەوە بۆیان بۆئەوەی قاچی لەسەردابنێن. دەبێت لە هەموو شارو شارۆچکەیە‌ك هێزی بەرگری جەماوەری دروست بکەین‌و خۆمان پڕچەك بکەین‌. ئامادەی بەرپەرچدانەوەی نیازە چەپەلەکان‌و تەنانەت راماڵینی تیرۆریستانی داعش‌و هاوپەیمان‌و هاوکارەکانیان لە پاشماوەکانی رژێمی دڕندەی بەعس‌و گروپە ئینسانکوژەکانی دیکە بین.

 

جەماوەری عێراق‌و کوردستان بەدەر لە دابەشکاریە نەتەوەیی‌و ئاینی‌و مەزهەبیەکان، وەکو هاوڵاتی‌و ئینسانی هاوچارەنوس نەک هەر هیچ دوژمنایەتی‌و ناکۆکیەک لە بەرژەوەندیەکانیاندا نیە، بەڵکو دەبێ دەستی یەک بگرن لەپیناو چارەنوسیکی  ئازادو درەوشاوەی هاوبەش. لەهەر گۆشەیەکی عێراقدا، پێویستە بۆ روبەروبونەوەی مەترسیەکانی ئیستاو ملهوری هەر هیزیک بەسەریاندا وە بۆ بەدەستەوەگرتنی چارەنوسی خۆیان، لە ریزێکی یەکپارچەی دوور لە ناکۆکی‌و رق‌و کینەی کۆنەپەرستانە‌و دروستکراوی قەومی‌و تائیفیدا، ریکخراوو چەکداربن. خەڵکی ناوچەکانی موسڵ‌و تکریت‌و سەڵاحەدین‌و ئەنبارو دیالەش وەکو خەڵکی کوردستان‌و باقی ناوچەکانی دیکەی عێراق بەرژەوەندییان لە راماڵینی  تیرۆریستانی خوێنخۆری داعش دایە. بەپێچەوانەی پروپاگەندەی لایەنه ناسیونالیست‌و نەتەوەپەرست‌و تائیفیە کۆنەپەرستەکانەوە، تاوەکو ئیستا خەڵکی ئەو ناوچانە گەورەترین باجی دەسەڵاتی ئەم تاقمە ئینسانکوژەیان داوەو بەر لە هەموان ماف‌و کەرامەت‌و حورمەتی ئینسانیی ئەوان بووە بە خۆراکی جانەوەرانی داعش. ئەم باندە‌و باقی رەوتە کۆنەپەرستە ئیسلامی‌و نەتەوەپەرستەکانی وەکو پاشماوەکانی بەعس‌و نەقشبەندیەکان‌و "سوپاي ئيسلامي" و"انصار الاسلام" نەک هەر نوێنەری هیواو ئومێدو خواستەکانی ئەوان نین لە ژیانێکی ئارام‌و شکۆمەندو یەکسان، لە نارەزایەتیان بەرامبەر بە هەر زوڵم‌و جیاکاریەکی تائیفی کەلەلایەن دەسەڵاتی کۆنەپەرستی تائیفی مالکی‌و ئیسلامی سیاسی شێعەوە رووبەرویان بۆتەوە، بەڵکو ئەم تاقمانە مایەی کارەساتی زیاترو زیندەبەچاڵکردنی هەر تروسکایەکی ئومێد‌و خۆشبەختی‌و ژیانێکی ئارامن کە بۆ خەلکی ئەو ناوچانە مابێتەوە. جەماوەری ئەو ناوچانە تائیستا بەهەر جۆریک بۆیان لوابێت، تەنانەت بە هەلهاتن‌و ئاوارەبون، نەفرەت‌و نارەزایەتی خۆیان لەم ئینسانکوژانە دەربریوە، بۆیە ئەوان نەک نابیت بخرینە ریزی داعش‌و نەتەوە پەرستەکانی بەعسی فاشیستەوە، بەڵکو دەبێ دەستی هاوچارەنوسی‌و هاوکارییان بۆ درێژبکرێت‌و ئاسۆی رزگاریی هاوبەش لە دەسەلاتی ئەو ئینسانکوژانەیان  نیشانبدرێت. ئەمە ریگایەکە کە دەتوانی دەستی ئەو تاقمانەش ببەستیت لە فریودان‌و راپیچکردنی جەماوەری ئەو ناوچانە بەدوای بەربەریەتی خۆیاندا.

 

بەهەمانشێوە، هەوڵەکانی ئیسلامی سیاسی شیعەو حیزبەکانی‌و دەسەلاتی مالکی بۆ خۆشکردنی ئاگری شەڕی تائیفی لەدژی بەشێك لە دانیشتوانی عێراق بەناوی دژایەتی تیرۆریستان‌و داعشەوە، راستەوخۆ دژی بەرژەوەندی خەڵکی عێراقە‌و کۆمەك بە کۆتاییهێنان بە داعش‌و مەترسیەکانی لەسەر هاوڵاتیانی عێراق‌ ناکات! هەروەکو بانگەشەی توندکردنەوەی کینەورقی نەتەوەپەرستی‌و دژایەتیکردنی عەرەب لەلایەن گروپە ناسیۆنالیست‌و نەتەوەپەرست‌و راسیستەکانی کوردەوە، بەناوی دژایەتیکردنی داعش‌و تاوانەکانی ئیسلامی سیاسی عەرەبی‌و رەوتە رەگەزپەرستەکانی عەرەب بەرامبەر خەڵکی کوردستان، نەك هەر ئاگری شەڕی نەتەوەیی نێوان کوردو عەرەب خۆش دەکات‌و بەرەو لێواری تەقینەوەی دەبات‌و کارەسات‌و ماڵوێرانی دەکاتە نسیبی خەڵکی کوردستان‌و عیراق، بەڵکو راستەوراست کۆمەك کردنە بە جێبەجێبوونی سیاسەتەکانی داعش بۆ هەڵخڕاندنی گیانی نەتەوەپەرستی‌و ئیسلامگەرایی لەناو هاوڵاتیانی عەرەبزماندا دژی خەڵکی کوردزمان‌و بەهێزکردنی لەشکری جەنگاوەرانی داعشە بۆ پەلاماردانی خەڵکی کوردستان. سەرجەم ئەم هەوڵ‌و پروپاگەندە نەتەوەپەرست‌و تائیفیانە پیلانی کۆنەپەرستانەی هیزە ناسیۆنالیست‌و ئیسلامیەکانن بۆئەوەی هەرکامیان جەماوەریک بکەن بە لەشکری رەشی خۆیان‌و لەپیناو بەرژەوەندیە سیاسیە کۆنەپەرستانەکانی خۆیاندا بەکوشتیان بدەن. کریکاران‌و جەماوەری ئازادیخوازی عیراق‌و کوردستان، بە دەر لەوەی بە زمانی کوردی یان عەرەبی یان تورکی یان هەر زمانیکی تر دەدوین‌و بەدەر لەوەی ناسنامەی کام نەتەوەو دین‌و تائیفەیان بەسەردا سەپێنراوە، وەکو بەشیک لە مرۆڤایەتی، هاوچارەنوس‌و خاوەن بەرژوەندی هاوبەشن لە بنیاتنانی ئایندەیەکی ئازادو شادو ئارام و خوشگوزەران کە هەموان تیایدا ئازادو یەکسان بن. بۆیە دەبێ دژی پیلانی دابەشکاری‌و تەفرەقەسازی نیوانیان بن، نابی بەو پروپاگەندانە فریو بخۆن.

 

پێویستە لەوناوچانەی داعش دەسەڵاتی نەگریسی خۆی بەسەریدا سەپاندوە یەکەم چەخماخەی بەرەنگاربوونەوەی جەماوەری دژی داعش‌و تیرۆریستانی هاورێبازیان دەست پێبکات‌و سەرجەم خەڵکی ئازادیخواز‌و جەماوەری کرێکارو زەحمەتکێش‌و شۆرشگێڕانی ئینسادۆست‌ لەسەراسەری عێراقدا لەپاڵ  خەڵکی ئەو ناوچانەدا رابوەستن‌و هێزیان پێببەخشن. حیزبی کۆمۆنیستی کرێکاریی عێراق‌و کوردستان بەهەموو توانایانەوە بۆ ئەنجامدانی ئەم ئەرکە‌و سەرخستنی ئەم پرۆژەیە تێدەکۆشن‌. هەردوو حیزب لەهەوڵی پیکهاتنی هێزی چەکداری جەماوەریدا دەبن‌و بەکردەوە بۆی دەست بەکاردەبن. ئەم هێزە چەکدارەی خەڵك تاکە بازوویەکی پۆڵاین‌و بەهیزە کە جەماوەر دەتوانن دوور لە هیچ گومان‌و دوودڵیەك بەتەواوی باوەڕی پێبکەن‌و پشتی پێببەستن. دەتوانن ئیرادەو جوڵەو کارکردی بەدەستەوە بگرن‌و نیگەرانی ئەوە نەبن کە ژیان‌و چارەنوسیان بۆ بەرژەوەندی سیاسی هەراج بکات‌و رۆژی رووبەروبوونەوە بە دەستی خاڵی بەجێیان بهیلیت‌و بیانکات بە خۆراکی دڕندە ئینسانخۆرەکان. هەرلێرەوە هەردوو حیزب بانگەوازی تەواوی تێکۆشەران‌و هەڵسوڕاوانی بزوتنەوەی کرێکاری، بزوتنەوەی جەماوەری، بزوتنەوەی ژنان، خەلکی ئازادیخواز، دۆستان‌و لایەنگرانی هەردوو حیزب، ئازادیخوازان‌و شۆرشگێڕانی چەپ‌و کۆمۆنیست‌و هەموو ئەو کەسولایەنانە دەکەن کە خۆیان لەم پەیام‌‌و ئەرکەدا لەگەڵ ئێمە بەبەشدار دەزانن، بۆ پەیوەست بوون بەم بزوتنەوە جەماوەریەوە، بۆئەوەی هەموو پێکەوە بزوتنەوەیەکی بەهیزی جەماوەری بۆ بەرەنگاربوونەوەی شۆرشگێڕانە لە دژی داعش‌و بۆ بەرگری لە ئەمنیەت‌و ئارامی‌و ماف‌و کەرامەتی هاولاتیان‌و گیرانەوەی ئیرادەو چارەنوس بۆ دەستی خۆیان، بەرێبخەین. لەم ریگایەدا پێشوازی لە هاوکاری‌و بەدەنگەوەهاتنی هەر هێزو لایەنیکی لایەنگر لە ئازادی‌و مەدەنیەت‌و پیشکەوتنخوازی دەکەین. هاوکات هۆشداری دەدەین بە لایەنەکانی دەسەلات لە عیراق‌و کوردستان کە خۆیان دوور بگرن لەهەر جۆرە رێگری‌و کێشە دروستکردنیک بۆ ئەم بزوتنەوە جەماوەریە، چونکە هەر هەنگاویکی بەمجۆرە راستەوخۆ خزمەت بە ئینسانکوژانی داعش دەکات‌و جەماوەری خەڵك بە دەستی بەستراوەوە تەسلیم بە بەربەریەتی ئەوان دەکات.

 

بژی هێزی چەکداری جەماوەری! 

 

مەکتەبی سیاسی

 حیزبی کۆمۆنیستی کرێکاریی کوردستان  حیزبی کۆمۆنیستی کرێکاریی عێراق                                                          

                                                                                       ١١/٨/٢٠١٤                

 

 

لە دونیای ئازاد و دێمۆکراتیکدا هەڵە سەربازی و سیاسیەکان کاردانەوەی جیاواز بە دوای خۆیان دا دێنن و لەبەرانبەر هەر کارێکی شکست خواردو یان هەر پلان و بەرنامەیەکی هەڵە دا کەس یان کەسانێک دێنە پێش و بەرپرسیارێتی هەڵە و کەموکوری‌یەکان دەگرنە ئەستۆی خۆیان، وەک بۆتە باو و رەنگبێ ئەگەر ڕۆژانەش نەبێت؛ ئەوە لە هەفتە و مانگ و ساڵەکاندا دەبینین و یان دەبیسین کە دەیان کەس لە بەڕێوەبەران و پلە بەرزە سیاسی و نیزامی‌یەکان لە وڵاتە پێشکەوتوەکاندا بە هۆکاری ئەوەی کە توانای بەڕێوەبردنی ئەو ئەرکەیان نی‌یە کە کەوتۆتە سەرشانیان، یان بە هۆی کەمکاری‌ و هەندێک سیاسی، نیزامی و... ی هەڵەوە دەست لە کارەکانیان و لە پۆستەکانین دەکێشنەوە و ڕادەستی کەسێکی دیکەی دەکەن کە شیاوتر و لێزانتر و بە تواناترە لەو بوارەداە! هەرچەندە بە رواڵەت ئەو کارە مانای تەسلیم بون و دان نانە بەو ڕاستی‌یە تاڵەی کە ئەو کەسە توانای بەڕێوەبردنی ئەو ئەرکەی نی‌یە کە پێسپێردراوە، بەڵام لە ڕاستیدا ئەو کارە و ئەو تەسلیم بونەش لە جێگای خۆیدا گەورەترین خزمەتی ئەو کەسە یان ئەو بەرپرسەیە بە خاک و نەتەوە و وڵاتەکەی خۆی، چونکە باش دەزانێت بونی ئەو لەو پۆست و پلە و پایە و لە داهاتو دا رەنگە زیانی زیاتری بەدواوە بێت نەک سود و ئیستفادە، هەر بۆیە ڕێگای دەست لەکار کێشانەوە دەگرێتە پێش و بەو کارەی هەم گلەو گازەندەکان لەسەر خۆی کەم دەکاتەوە و هەم خزمەتێکی زۆر و بەرچاویش بە خاک و وڵاتەکەشی دەکات.

لێرەدا بۆ ئەوەی توانیبێتمان خوێنەر لە دەقی بابەتەکە تێبگەیەنین پێویستە بە کورتی و لە چەند خاڵێکدا ئاماژە بە روداوەکانی بەر لە ئاوارە بون و دەربەدەری و بێ نان و ئاو بونی خەڵکی شنگال بکەین.

١- داعش لە هێرشێکی کوتوپڕدا ناوچەیەکی بەرفراوانی ئێڕاقی داگیر کرد و هەرچی چەک وچۆڵی هێزەکانی دەوڵەتی ئێڕاق لە موسڵ و تکریت بو کەوتە دەستی داعش و دواتریش خەلافەتی ئیسلامی ڕاگەیاند.

٢- هێرشی داعش بۆ سەر ئێڕاق باشترین هاوکاری بو بۆ کورد کە بتوانێ جارێکی دیکە دەست بەسەر ئەو شوێنانەدا بگرێت کە حکومەتی ئێڕاق نە بە یاسا و نە بە زۆر و نە بە خۆشی و ناخۆشی ئامادە نەبو بیداتەوە دەست کوردەکان و بخرێتەوە سەر هەرێمی کوردستان، هەربۆیە بەهۆی ئەو هێرشەی داعش و شکانی سوپای ئڕان زۆربەی خاکی کوردستان کەوتەوە ژێر دەستی پێشمەرگە و ئەو ناوچانەی زیاد لە بیست ساڵ بو ڕێگا نەدەدرا بێنەوە سەر هەرێمی کوردستان لە ماوەی چەند سەعاتێکدا کەوتنەوە دەستی پێشمەگە و بونەوە بە بەشێک لە خاکی هەرێم.

٣- هەڕەشەی ئاشکرای بە نێو دەوڵەتی ئیسلامی و بڵاو کردنەوەی نەخشەی ویلایەتی کوردستانی لە لایەن خەلافەتی ئیسلامی و شەڕی ئەو هێزە تیرۆریستی‌یە لەگەڵ پێشمەرگەدا هەر لە رۆژاوا و شنگالەوە بگرە هەتا دەگاتە جەلەولاو سەعدیە و خانەقین و مەندەلی لە هەندێک شوێن بە بەردەوامی و لە هەندێ شوێن بە شێوەی پچڕ پچڕ هەبو.

 ٤- داعش یان بڵێم خەلافەتی بە نێو ئیسلامی بە ئاشکرا دژایەتی کورد و هەرێمی کوردستانی دەکرد و گەورە و چوکە دەیانزانی کە داعش وەک چۆن دژی عەرەبی شیعەیە ئاواش دژی کوردە؛ جا ئەو کوردە چ شیعە یان سونی و ئێزێدی یان هەر دینێکی دیکەی هەبێت، ئەوە سەرەڕای بڵاوکردنەوەی نەخشەی ویلایەتی کوردستان لە لایەن خەلافەتی ئیسلامیەوە.

رەنگە ئەوە چەند خاڵە بەس بێت بۆ ئەوەی هەمومان باش لەوە تێبگەین کە وەک داعش و پشتیوانەکانی داعش چەندە دژایەتی کورد و ئەو هەرێمە ئازادەیان دەکرد، ئەوە چەند خاڵەی کە کە باسکران سەلمێنەری ئەو ڕاستی‌یەن و دەریدەخەن کە داعش یەکێک بو لە مەترسیە سەرەکیەکان بۆ سەر کوردستان و پێموایە پێویست بە هیچ بیانو بەهانەیەک ناکات و هەر قسە و بەهانەیەکیش ئەگەر لەو بوارەدا بهێنرێتەوە تەنیا بۆ چاوبەستنی خەڵک و سود و قازانجی تاکەکەسی و دەست نەکێشانەوە لە پۆست پلە و هەروەها خۆ بە زل زانی و بە گێل و نەفام زانینی خەڵکی کوردە.

لە کاتێکدا ئەو راستیانە بە باشی دەزاندران و نەک تەنیا بەرپرسان و پلەدارە دەوڵەتی و حیزبی‌یەکان تەنانەت خەڵکی ئاساییش ئاگاداری هەمو ئەو راستی‌یە بون، کەچی نە حکومەتی هەرێمی کوردستان بە پلە یەک و نە سەرکردایەتی حیزبەکانیش هیچ کردەوەیەکیان لە خۆیان نیشان نەداو بۆ تاقە جارێکیش ئەو بابەتە گرنگەیان لە نێو مێدیا و کۆر و کۆبونەوەکاندا نەوروژاند، پارلەمان و وەزارەتەکان و بەتایبەت وەزارەتی پێشمەرگە و ناوخۆ نەک هەر هیچیان نەکرد، بگرە وەک ئەوەی نە بای هاتبێت و نەباران، سەر و بنی قسەیان ئەوە بو کە پێشمەرگە ورەی بەرزە و باشترین و مۆدێرن ترین چەکی لە دەست دایە، هیچکەس و هیچ هێزێک ناتوانێ روبەروی پێشمەرگە بێتەوە، سنورەکانی کوردستان هەر هەمو بە پێشمەرگە تەنراوە و خەڵکی کوردستان دڵنیا دەکەینەوە کە هیچ مەترسیەک نی‌یە بۆ سەر کورد و دانیشتوانی کوردستان، دەزگا پێوەندی دارەکانی پێشمەرگە و ئاسایش و دژە تیرۆر ئامادەی هەر جۆرە دژکردەوەیەکی لە ناکاون ئەگەر روبدات و... ئیدی بەو جۆرە قسانە هەمو خەڵکی کوردستانیان دڵنیا کردبۆوە لەوەی کە نەک داعش ، بەڵکو هیچ هێزێکی دیکەش و بگرە لە داعش بەتواناتریش توانای ئەوەی نی‌یە پێ بنێتە خاکی کوردستان و بستێک لەو خاکە داگیر بکات، مەگەر ئەوەی بە دیل و دەستبەستراوی پێ بنێنە خاکی کوردستانەوە، دەنا هیچکەس توانای شکاندنی پێشمەرگەی نی‌یە، کات رۆیشت و سەرئەنجام هێرشێکی لە ناکاوی داعش پێشمەرگەی شکاند و ناوەچەیەکی بەرفراوانی کوردستان کەوتە دەستی هێزەکانی داعش، (بۆیە دەڵێم شکان چونکە ئەگەر قەرار بێت ئەو شکانە ناو بنێین تاکتیک و ئەوە تاکتیکی نیزامی بێت، لە هیچ شوێنێک نەبوە و ڕوینەداوە کە شارێک بە هەمو خەڵکەکەیەوە بۆ دوژمن چۆڵ بکەی و بڵێی فەرمو بە دڵی خۆت بکوژە و ببرەو زیندەبەچاڵ بکە)، پێشمەرگە شكا و بەشێکی هەڵات بۆ رۆژاوا و بەشێکیشی بۆ ناوچەکانی دیکەی باشور و چەند پێشمەرگەیەکیش شەهید بون، بەشێکی کەم لە خەڵک دەرباز بون و هاتنە ناوچە ئارامەکان و بەشی زۆریش هەڵاتن و بە رواڵەت لە دەستی داعشەکان ڕزگاریان بو؛ بەڵام کەوتنە دەستی بێ نان و ئاوی و جێگاو ڕێگا و لەوێشدا چاوەڕوانی ئەوە بون کەی داعشەکان یان بێ ئاوی رۆحیان لێدەستێنێت، کەوتنە ناو چیا و بەبێ هەبونی هیچ ئیمکاناتێک لە شاخ و کیوەکانی شناگال مانەوە و چاوەڕوانی دەستێک بون کە لە مرگ و مردن رزگاریان بکات! کات رۆیشت و ئەوە زیاد لە یەک هەفتەیە هێشتا هەر وەک لە مێدیاکاندا بڵاو دەکرێتەوە زۆربەی ئەو خەڵکە هەروا ماونەتەوە و چاوەرانی یارمەتی و هاوکاری و ڕزگاربونن، (دیارە کۆمەڵێکی بەرچاو لەو خەڵکە ڕزگاریان بوە بەڵام ‌هێشتا خەڵکێکی زۆر هەر لەو چیا و شاخ و دۆڵانە هەر بە برسێتی ماونەتەوە) کەچی هێشتا هەر هیچ و هەر کەس! هێشتا کەس خۆی بە بەرپرس و خۆی بە خەمخۆر نەزانیوە و ئەوەی کە دەبو بکرێت هەم لە پێش ڕوداوەکە و هەم لە دوای روداوەکەش هەر نەکرا و هەر کەس نەبو بڵێ من بەرپرسم، کەس نەبو بڵێ من کەمتەرخەم بوم، کەس نەبو بڵێ من لەبەرانبەر ئەو تراژیدیا مرۆی‌یە گەورەیەدا خۆم بە تاوانبار دەزانم و شەرمەزارم، کەس نەبو بڵێ مردنی منداڵە چاوگەشەکان هەڵەی منی تێدا بو، کەس نەبو بڵێ برسێتی و تینوێتی ئەو دەیان هەزار کەسە دەخەمە ئەستۆی خۆم و بە دەست کێشانەوە لە پۆستەکەم و دان نان بە هەڵەکەم داوای لێبوردن لەو ژنانە دەکەم کە داعش بێسەروشوێنی کردون و کەس نازانێ چیان بەسەر هاتوە ، کەس نی‌یە داوای لێبوردن لە بنەماڵەی ئەو شەهید و بریندار و بێسەروشوێنکراو و برسی و تینو ئاوارە و دەربەدەر و ماڵ وێران کراو و منداڵە چاوگەشانە بکات کە لەبەر بێ شیری و تیشکی گەرمی لیزەر ئاسای هەتاوی شاخەکانی شنگال گیانیان سپارد، کەس نەبو بە دو وشە و ئەگەر بە رواڵەتیش بێت داوای لیبورد بکات و دەست لە پلە و پایەکەی هەڵبگرێت،  باشە دەبێ بۆ هیچکەس خۆی بە بەرپرس نەزانێت لەبەرانبەر ئەو تراژیدیا مرۆی‌یەدا؟! ئایە کەس هەڵەی نەکردوە؟! ئایە تراژیدیای مرۆیی شنگال هەڵەی کەسی تێدانەبوە؟! ئایە ئەوە هەڵەی ئەو خەڵکەیە کە نەیان توانی زوو رابکەن؟! ئەی ئەگەر وانی‌یە دەبێ هەڵەی کێ بێت، ئایە ئەو خەڵکە چونکە نەیانتوانی ڕابکەن بۆیە دەبێ سزای درەنگ راکردنەکەیان بەمجۆرە وەربگرنەوە؟! ئەی ئەگەر وا نی‌یە بۆ لە ناو ئەو حکومەتی هەرێمی کوردستانە دا کە سەرۆک و سەرۆک وەزیر و دەیان وەزیر و پەرلەمانتار و پلەداری سەربازی و ئیداری و ...... هەیە؛ بۆ کەس نەبو خۆی بە بەرپرس بزانێت بەرانبەر ئەو تراژیدیا مرۆی‌یە کە بەسەر ئەو هەزاران کەس و بناماڵانە هات؟! باشە بۆ خەڵکی ئاسایی شارەکان، ژن و پیاو و گەنج و تەنانەت منداڵەکانیش هەست بە بەرپرسیارێتی دەکەن و بە کردەوە ئامادەن سەروماڵیان لە پێناو شنگال و شنگالیەکاندا ببەخشن، ژنان و پیاوانی کورد لە باشور و باکور و رۆژهەڵات و رۆژاوا و بگرە لە ئوروپا و وڵاتانی دورە دەستیشەوە بە کردەوە سەلماندیان کە ئامادەن بۆ هەرجۆرە فیداکاریەک و خۆیان لە ئاست ئەو تراژیدیایە بە بەرپرس زانی و ئەوەی لە دەستیان هات کردیان و دەیکەن، بەڵام بەرپرسە سەرەکی‌یەکان ئامادە نین شان وەبەر ئەو بەرپرسیارێتی‌یە بدەن،  باشە ئەگەر باسی موچە و زەوی پێدان و ئۆمبێل و ... ئەو شتانەش بایە هەر بەو جۆرە دەبون کە ئێستا هەن؟! دڵنیام کە ئەگەر باسی دۆلار و نەفت و سەیارە و... بایە ئێستا سەدان و بگرە هەزاران کەس لە بەرپرس و پلە بەرزە سیاسی و سەربازیەکان پێشبڕکێیان دەکرد بۆ چونە سەر شاشەی تیڤی و لێدوان دان بۆ رۆژنامە و قسەکردن لە سەر رادیۆکان و چەندین پەیام و بەڵێنیان بەو خەڵکە لێقەوماوە و سەرجەم خەڵکی کوردستان دەدا، بەڵام ئێستا کەس نی‌یە و کەس مەسئول نی‌یەو کەس بەرپرسیارێتی ناخاتە ئەستۆی خۆی و هەرکەسە و بەجۆرێک خۆی لە کامێرا و میکرۆفۆنەکان دەشارێتەوە!

ئەو کارەساتە گەورە و ئەو تراژیدیا مرۆی‌یەی کە بەسەر خەڵکی شنگال هات ئەگەر لە هەر وڵاتێکی دیکە بایە بە دڵنیای‌یەوە ئێستا نەک هەر بەرپرسێکی سیاسی و پلەدارێکی سەربازی، رەنگ بو دەیان کەس لە بەرپرسە سیاسی و سەربازیەکان دەستیان لە کار دەکێشایەوە و دەهاتنە سەر تەلەفزیۆنەکان و داوای لێبوردنیان لەو خەڵکە دەکرد و دانیان بە کەمکاری و هەڵەکانی خۆیان دادەنا و شوێنەکانی خۆشیان چۆڵ دەکرد بۆ کەسانی دیکە، بەڵام بەداخەوە ئەوە بۆ دو هەفتە نزیک دەبێتەوە کە ئەو کارەساتە رویداوە؛ بەڵام تا ئێستاش کەس خۆی بە بەرپرس نەزانیوە و نازانێت!  

با ئێستا لە ئێوە خوێنەران و خەڵکی کوردستان بپرسم، بە ڕای ئێوە دەبێ کێ بەرپرس بێت لە ئاست ئەو کارەساتە گەورەیەی کە بەسەر ئەو هەزاران کوردە هاتوە لە شنگال و دەوروبەری؟!

قادری خەندەڕەش

١٠/٨/٢٠١٤

 

 

لەم بابەتانەدا هەوڵ دەدەم کە کاریگەرییەکانی ئۆجەلان لەسەر کێشەی کورد لە بەشەکانی کوردستان شی و شرۆڤە بکەم و ئاوڕێک لە فەلسەفەی ئۆجەلان و هزری ئەو کەسایەتییە بدەمەوە. لەم خوێندنەوەیەدا ئۆجەلان و پارتی کرێکارانی کوردستان وەک دوو کایەکەر و ئەکتەری سیاسیی جیاواز دەردەکەون کە هەرکامەیان خاوەن تاکتیک و بۆچوونی سیاسیی جیاواز و تاییبەت بەخۆیە.

 

 

ئۆجه‌لان و پێگه‌ی له‌ ئاڵوگۆڕه‌كانی باكوور دا؛

له‌گه‌ڵ ئه‌وه‌دا كه‌ به‌ڕێز ئۆجه‌لان ماوەی پتر لە پانزە ساڵە له‌ یەکێ لە به‌ندیخانه‌کانی توركیه‌ و له‌ دوورگه‌یه‌كی دووره‌په‌رێزدا به‌ند كراوه‌، كه‌چی تاكوو ئیستاش هێز و پێگه‌ی خۆی پاراستووه‌ و بگره‌ به‌ندكردنه‌كه‌شی لەوە ڕێگر نه‌بووه‌ كه‌ جوڵه‌ به‌ گه‌ل و كۆمه‌ڵگای باكووری كوردستان بكات و بنه‌ماکانی سیاسیی و كۆمه‌ڵایه‌تیشی هه‌میشه‌ و هه‌رده‌م یارمه‌تیده‌ری شوێنكه‌وتووانی بووه‌ و هاوكات زۆر كه‌سی دیكه‌ش له‌ ده‌ره‌وه‌ی ڕێكخستنه‌كانی په‌كه‌كەدا‌ توانیوێتی له‌ وته‌ و نووسراوه‌كانی ئۆجه‌لان كه‌ڵكی باش وه‌ر بگرێت. به‌ڕێز ئۆجه‌لان به‌ندكردنه‌كه‌ی به‌گۆشه‌گیری سیاسیی و كۆمه‌ڵایه‌تی تێپه‌ڕ نه‌كرد و به‌ هه‌لێكی هه‌ڵكه‌وتوو و به‌رده‌ست ئه‌ژماری كرد كه‌ له‌ قۆناغی شۆڕش و خه‌بات و تێكۆشانیدا ئه‌و ده‌رفه‌ته‌ی بۆ نه‌ڕه‌قساوه‌ ‌كه‌ كاتی گونجاو و پێویست بۆ كۆڵینه‌وه‌ له‌ ڕووداوه‌كانی مێژووی ڕۆژهه‌ڵاتی نێوەڕاست و زاگرۆس ته‌رخان بكات و خوێندنه‌وه‌ی سیاسیی و كۆمه‌ڵایه‌تیی بۆ قۆناغ و بڕگه‌كانی مێژووی شاراوه‌ی زاگرۆس و مێزوپۆتامیا بكات، بۆیه‌ له‌و كاته‌وه‌ كه‌ به‌ندكراوه‌، هه‌موو هه‌وڵ و تێكۆشانی خۆی خستووەتە‌گه‌ڕ به‌ مه‌به‌ستی ئه‌وه‌كه‌ خوێندنه‌وه‌یه‌كی نوێ بۆ شارستانییه‌تی كۆنی كوردستان بكات و ڕووداوه‌كانی شارستانییه‌تی سوومێر و مێدیا و كوردستان پێكه‌وه‌ گرێ بدات و ڕه‌وتی ڕووداوه‌ نوێكان به‌ مێژوو ببه‌ستێته‌وه‌. له‌گه‌ڵ ئه‌وه‌شدا كه‌ به‌ڕێز ئۆجه‌لان ده‌ستی به‌ هه‌موو چه‌شنه‌ سه‌رچاوه‌كانی مێژوو و زانست له‌ ده‌ره‌وه‌ی به‌ندیخانه‌ نه‌ده‌گه‌ییشت، به‌ڵام خوێندنه‌وه‌كه‌ی ڕه‌ئالیستییانه‌ بوو و به‌ درووستی شرۆڤه‌ و شیكاری پێویستی بۆ دۆخی سیاسیی مێژووی كورد و ڕووداوه‌ نوێكان كرد و لەو پێوەندییەدا توانی هه‌ڵێنجانێکی زانستیی و مێژوویی و پێویست به‌ ئه‌نجام بگه‌ێنێت.

 

 

ئۆجه‌لان له‌گه‌ڵ ئه‌وه‌دا كه‌ له‌ژێر ده‌سه‌ڵاتی میت و سیسته‌می ڕه‌گه‌زپه‌ره‌ستی توركیه‌دا به‌ند كراوه‌، به‌ڵام تاكوو هه‌نووكه‌ش كاریگه‌ری له‌سه‌ر سیاسه‌تی قه‌ندیل و باكوور و ڕۆژئاوای كوردستان و له‌ هندێك دۆخی تاییبه‌تیشدا له‌سه‌ر باشوور و ڕۆژهه‌ڵاتی كوردستانیش هه‌یه‌ و هاوكات بۆچوونه‌كانی بوونه‌ته‌ پردی پێوه‌ندی نێوان به‌شێك له‌ پارچه‌كانی كوردستان و به‌ تاییبه‌ت باكوور، ڕۆژئاوا، "قه‌ندیل" و باشووری كوردستان. ئه‌مه‌ش به‌و واتایه‌ دێت كه‌ به‌ندیخانه‌ نه‌یتوانیوه‌ پاشه‌كشه‌ به‌ هزر و فه‌لسه‌فه‌ی ئۆجه‌لان بكات و وه‌ك هه‌وری ڕه‌ش ڕێ له‌ ڕووناكی خۆر بگرێت. هاوكات هه‌ڵوێست و كاریگه‌ری بۆچوونه‌كانی به‌ڕێز ئۆجه‌لان بووه‌ هۆی ئه‌وه‌كه‌ ده‌سه‌ڵاتی سیاسیی توركیه‌ و به‌تاییبه‌ت پارتی دادوگه‌شه‌پێدان، گۆڕانكاری قووڵ له‌ به‌شێك له‌ سیاسه‌ت و ئیستراتیژییه‌كانی خۆیدا پێك بهێنێت و بره‌و به‌ كرانه‌وه‌ی سیاسیی و كۆمه‌ڵایه‌تیی و ئابووری بدات و به‌كرده‌وه‌ هه‌نگاو به‌ره‌و چاره‌سه‌ریی كێشه‌ی سیاسیی كورد بنێت، له‌وه‌ش گرینگتر ئه‌وه‌ بوو كه‌ ده‌سه‌ڵاتی سیاسیی له‌ توركیه‌ خۆنه‌ویستانه‌ ده‌ستپێ كردنی وتووێژ له‌گه‌ڵ به‌ڕێز ئۆجه‌لان به‌ به‌شێك له‌ پڕۆسه‌ی چاره‌سه‌ر كردنی كێشه‌ی كورد گرێدا و سه‌ركه‌وتنی پڕۆسه‌ی دیموكراسی له‌و وڵاته‌ به‌سته‌وه‌ به‌ وتووێژ و پێكهاتن له‌گه‌ڵ به‌ڕێز ئۆجه‌لان دا، ئه‌مه‌ش به‌ واتای ئه‌وه‌ دێت كه‌ ئه‌گه‌ر بێتوو و كێشه‌ی كورد چاره‌سه‌ر بكرێت، ئه‌وا له‌ ئازادكردنی به‌ڕێز ئۆجه‌لانه‌وه‌ ده‌ست پێ ده‌كات و په‌ل ڕاده‌كێشێت بۆ پرسه‌كانی سیاسیی پێوه‌ندیدار به‌ باكووری كوردستان. دیاره‌ ده‌سه‌ڵاتی سیاسیی توركیه‌ هیچكات ئه‌وه‌ی پێ درووست نه‌بووه‌ كه‌ له‌گه‌ڵ به‌ڕێز ئۆجه‌لاندا بكه‌وێته‌ دیالۆگ و وتووێژه‌وه‌، هۆكه‌شی ئه‌وه‌یه‌ كه‌ له‌ ئاكامدا ئۆجه‌لان ده‌بێته‌ ماندێلای كورد و ڕۆژهه‌لاتی نێوه‌ڕاست و ته‌نانه‌ت جیهانیش، ئه‌مه‌ش له‌ قازانجی توركیه‌ و به‌گشتی ‌حوکوومەتی تورك نییه‌، چونکە ئەو کەسایەتییە بەندکراوی سیاسیی ئەو وڵاتە بووە، به‌ڵام بۆ ئه‌وه‌كه‌ هه‌نگاوه‌كانی كرانه‌وه‌ی سیاسیی له‌ باكووری كوردستان گشتگیر بێت و له‌لایه‌ن خه‌ڵك و كۆمه‌ڵگای باكووری كوردستانه‌وه‌‌ باییخ و گرینگیی پێ بدرێت، ده‌بوو كه‌ ده‌سه‌ڵاتی سیاسیی توركیه‌ و بەتاییبەت پارتی دادوگەشەپێدان ئه‌و هه‌نگاوه‌ مه‌زنه‌ بهاوێژێت.

 

 

دیاره‌ ئه‌گه‌ر پارته‌كانی دیكه‌ی ڕه‌گه‌زپه‌رەستی وه‌ك جه‌هه‌په‌ و مه‌هه‌په‌ ده‌سه‌ڵاتی سیاسیی توركیه‌یان به‌ده‌سته‌وه‌ بووبایه‌، ئه‌وا ئه‌و كرانه‌وه‌ له‌و ئاسته‌ به‌رز و به‌رفه‌راوانه‌دا ڕووی نه‌ده‌دا و نه‌ده‌هاته‌ كایه‌وه‌، بۆیه‌ ده‌كرێت بڵێین كه‌ ئاكه‌په‌ پارتیش به‌به‌شێك له‌ چاره‌سه‌ر كردنی كێشه‌ی كورد ئه‌ژمار ده‌كرێت و ده‌بێ كورد له‌ چاره‌سه‌ر كردنی ئه‌م كێشه‌ قووڵ و ئاڵۆزه‌دا هاوكاریی ئه‌م پارته‌ بكات و هاوكات پشتیوانی ئەو بەشە لە هه‌ڵوێستەکانی ئه‌م حیزبه‌ بكات كه‌ له‌ قازانجی چاره‌سه‌ری كێشه‌ی كورد ده‌یهێنێته‌ گۆڕێ، لانیكه‌م تاكوو هه‌نووكه سیاسه‌ته‌كانی ئه‌م پارته‌ بووه‌ته‌ هۆی ئه‌وه‌كه‌ كرانه‌وه‌ی سیاسیی و كۆمه‌ڵایه‌تی له‌ باكووری كوردستان بێته‌ كایه‌وه‌ و ئازادییه‌ كولتوورییه‌كانی كورد له‌و وڵاته‌ دەستبەر بێت و په‌ره‌ بستێنێت، ئه‌مه‌ش ده‌ستكه‌وته‌، دیاره‌ هاوكات خه‌بات و تێكۆشانی كورد له‌و وڵاته‌ و هه‌ستانه‌وه‌ی پارتی كرێكارانی كوردستان له‌ دژی ڕژیمی توركیه‌ به‌ هۆكاره‌كانی هاتنه‌ كایه‌ی ئه‌و ئاڵوگۆڕانه‌ی ئه‌مڕۆی گۆڕه‌پانی سیاسیی ئه‌و وڵاته‌ پێناسه‌ ده‌كرێن، بۆیه‌ ده‌ڵێم هه‌نووكه‌ كاتی ئه‌وه‌یه‌ كه‌ كورد له‌م قۆناغه‌دا پتر دان به‌خۆدا بگرێت و ئیزن به‌له‌بار بردنی ئه‌و ده‌رفه‌ته‌ نه‌دات كه‌ هه‌نووكه هاتووەتە پێش‌، هەروەها پێویسته‌ كه‌ كورد له‌ باكووری كوردستان ئه‌م هه‌له‌ به‌باشی بقۆزێته‌وه‌ و له‌ به‌رژه‌وه‌ندی نه‌ته‌وه‌كه‌مان كه‌ڵكی لێوه‌ر بگرێت، تاكه‌ هه‌ڵه‌یه‌ك كه‌ هه‌نووكه‌ له‌ گۆڕه‌پانی سیاسیی باكووری كوردستان و توركیه‌دا خۆ ده‌نوێنێت ئه‌وه‌یه‌ كه‌ به‌ده‌په‌ و هێزه‌ كوردییه‌كان وه‌ك پارته‌كانی دیكه‌ی جه‌هه‌په‌ و مه‌هه‌په‌ له‌یه‌ك ئاستدا دژایه‌تی ئۆردۆغان و ئاك پارتی ده‌كه‌ن، دیاره‌ ڕه‌خنه‌گرتن به‌ به‌شێك له‌ پڕۆسه‌ی دیموكراتی ئه‌ژمار ده‌كرێت و به‌تاییبه‌ت پێش به‌ڕێوه‌چوونی هه‌ڵبژاردن و له‌كاتی پڕوپاگه‌نده‌دا بڵاو بوونه‌وه‌ی ده‌نگی دژبه‌یه‌ك به‌ پرسێكی ئاسایی پێناسه‌ ده‌كرێت و سیستەمی دیموکراتیش بەبێ بوونی ڕەخنە سەرکەوتوو نابێت، به‌ڵام نابێ ئه‌و ڕه‌خنانه‌ ئه‌وه‌نده‌ قووڵ و كاریگه‌ر و گورزوه‌شێن بن كه‌ كاریگه‌ری نه‌رێنی له‌سه‌ر پڕۆسه‌ی كرانه‌وه‌ی سیاسیی له‌و وڵاته‌ دابنێت، چونكه‌ به‌شێكی زۆر له‌ دژایه‌تی كردنه‌كه‌ی پارته‌كانی ڕه‌گه‌زپه‌ره‌ستی وه‌ك جه‌هه‌په‌ و مه‌هه‌په‌ له‌ پێوه‌ندی بەو کرانەوە سیاسییەیە كه‌ ئاك پارتی بۆ چاره‌سه‌ر كردنی كێشه‌ی سیاسیی كورد هێناوێتییه‌ گۆڕێ، ئه‌و پارتانه‌ پێیان وایه‌ كه‌ ئه‌و كرانه‌وه‌ بنه‌ماكانی كۆماری توركیه‌ كه‌ كۆمارێكی سیكولاری ڕه‌گه‌زپه‌ره‌سته‌ و ئاماژه‌ به‌ یه‌ك نه‌ته‌وه و یەک ئاڵا‌ له‌و وڵاته‌ ده‌كات، ده‌هه‌ژێنێت و سه‌ره‌تایه‌كی نوێ له‌و وڵاته‌ ده‌ست پێ ده‌كات، ئه‌وه‌ش ده‌بێته‌ هۆی ئاوه‌ڵا بوونی ڕێ بۆ گه‌شه‌سه‌ندن و پێشكه‌وتن له‌ چاره‌سه‌ر كردنی كێشه‌ی كورد كه‌ له‌ ئاكامدا به‌ قازانجی نه‌ته‌وه‌ی كورد كۆتایی پێ دێت.

 

 

به‌ڕێز ئۆجه‌لان هه‌ستی به‌و ڕاستییه‌ كردووه‌ كه‌ ئاك پارتی تاكه‌ پارتێكی سیاسیی و هاوكات ئۆردۆغان تاكه‌ كه‌سایه‌تییه‌كی سیاسیی ئه‌و وڵاته‌یه‌ كه‌ لەم قۆناغەدا ده‌توانێت به‌بێ ترس ئه‌و هه‌نگاوه‌ مه‌زنانه‌ بنێت، ئه‌وه‌مان له‌بیر نه‌چێت كه‌ پێشتر كه‌س و كه‌سایه‌تیی گه‌لێكی دیکە هه‌بوونه‌ و ته‌نانه‌ت یەکێ لە سه‌رۆك كۆمارەکانی توركیه کە ناوی خە‌لیل تورگوت ئۆزال Halil Turgut Özal‌ بوو و لە بنەڕەتدا کورد و خەڵکی شاری چەرمووک و دایکیشی خەڵکی دێرسیم بووە و كاتی خۆی ویستی كه‌ پرسی كورد چاره‌سه‌ر بكات، به‌ڵام لە ڕێکەوتی ١٧ی ٤ی ١٩٩٣ی زایینی به‌ چه‌شنێكی گوماناوی گیانی له‌ده‌ست دا، دواتر ڕوون بووه‌وه‌ كه‌ له‌لایه‌ن میت و توركه‌ ڕه‌گه‌زپه‌ره‌سته‌كانه‌وه‌ ژه‌هرخوارد كراوه‌، خە‌لیل تورگوت ئۆزال هەشتەمین سەرۆک کۆماری تورکیە بوو و باییخی زۆر بە چارەسەری کێشەی کورد دەدا و پلانی ئەوەی هەبووە کە لەگەڵ بەڕێز ئۆجەلاندا کێشەی کورد چارەسەر بکات. بۆیه‌ دۆخی سیاسیی توركیه‌ دۆخێكی هه‌ستیاره‌ و پێویسته‌ كه‌ هه‌م ده‌سه‌ڵات و هه‌م كورد به‌ ئه‌سپایی هه‌نگاو هه‌ڵنێنه‌وه‌، لەبەر ئه‌وه‌كه‌ ده‌رفه‌ته‌كه‌ له‌بار نه‌چێت.

 

 

من پێم وایه‌ ئەگەر ئۆجه‌لان و ئۆردۆغان به‌م چه‌شنه‌ كه‌ تاكوو هه‌نووكه‌ هاتوونه‌ته‌ پێشه‌وه‌ هه‌نگاو بنێن، كێشه‌ی سیاسیی كورد چاره‌سه‌ر ده‌كرێت و په‌روه‌رده‌ی ڕه‌گه‌زپه‌ره‌ستیی له‌ توركیە‌ له‌ چاڵدا ده‌نێژرێت. ئه‌و چاره‌سه‌رییه‌ش كه‌ له‌و وڵاته‌دا دێته‌ كایه‌وه‌ كاریگه‌ری ئه‌رێنی له‌سه‌ر وڵاتانی ناوچه‌كه‌ و به‌تاییبه‌ت داگیركه‌رانی كوردستان داده‌نێت و ئه‌وانیش خۆنه‌ویستانه‌ ده‌بێ لاپه‌ڕه‌یه‌كی نوێ له‌ پێوه‌ندی به‌ چاره‌سه‌ر كردنی كێشه‌ی كورد هه‌ڵبده‌نه‌وه‌. هه‌روه‌ك له‌سه‌ره‌وه‌ ئاماژه‌م پێدا، چه‌نده‌ ئه‌گه‌ری چاره‌سه‌ر كردنی كێشه‌ی كورد له‌ باكووری كوردستان له‌ ئارا دایه‌، ئه‌وه‌نده‌ش ئه‌گه‌ری تێكچوون و له‌بار بردنی پڕۆسه‌كه‌ له‌ ئارادا هه‌یه‌، له‌به‌ر ئه‌وه‌ نه‌یاری چارسه‌ر كردنی كێشه‌ی كورد له‌ توركیه‌ زۆره‌ و ته‌نانه‌ت وڵاتێكی وه‌ك كۆماری ئیسلامیی ئێرانیش هه‌وڵی ئه‌وه‌ی داوه‌ و بەبەردەوام هەوڵیش ده‌دات كه‌ كۆرپه‌ی چاره‌سه‌ر كردنی كێشه‌ی كورد له‌ باكووری كوردستان له‌بار ببات.

 

 

لە کۆتایی بەشی یەکەمی ئەم وتارەدا بە پێویستی دەزانم ئاماژە بەوە بکەم کە تێکڕای ئاڵوگۆڕەکانی باکووری کوردستان لەژێر کاریگەری هزر و فەلسەفەی ئاپۆدا دێتە کایەوە و تەنانەت ئەو شەپۆلانەش ڕۆژئاوای کوردستانی گرتووەتەوە و گریمانەی ئەوەش دەکرێت کەلە داهاتوودا ڕۆژهەڵاتی کوردستانیش بگرێتەوە، هەر وەک چۆن دەسەڵاتی سیاسیی لە باشووری کوردستان کە لە ئاستی نێودەوڵەتیدا بەفەرمی دانی پێدا نراوە، ناتوانێت بەبێ لەبەرچاو گرتنی ڕای ئۆجەلان گوتارێکی نەتەوەیی پێوەندیدار بەدۆخی سیاسیی کورد لە هەموو بەشەکانی کوردستان مسۆگەر بکات.

درێژەی هەیە...

 

 

 


سڵاوی کوردەواری
 ئێمە وەک کۆمەڵێک نووسەرو رۆژنامەوانی شاری کەرکوک لە ناخەوە سوپاسی هەڵوێستی کوردانەو مەردانەو بوێرانەتان دەکەین، بە بەشداریتان لە شەڕی پاراستنی خاکی پیرۆزی باشووری کوردستان، چاوی یەکەیەکەتان ماچ دەکەین، دروود بۆ ئەو ئازایەتیو قوربانیدانەتان.
 نەمری بۆ شەهیدەکان و سەرکەوتن و سەرفرازی بۆ نەتەوەکەمان و هەموو ئازادیخوازان.
 ئێوە بە بەشداریتان لە رووبەڕووبوونەوەی دوژمنانی کوردو کوردستان، سنووری دەستکردی داگیرکەرانتان لەبەریەک هەڵوەشاندو دروشمی بەرزی "باکوور، باشوور، رۆژهەڵات... یەک ئامانج و یەک خەبات"ان کردە وێردی سەرزاری گەورەو بچووکی نیشتیمان، بۆیە جێی خۆیەتی دەست و نفەنگتان ماچ بکەین و لە ئامێزتان بگرین.
 لێرەشەوە سڵاو لە گیانبازیی شەهیدی میدیاکار "دەنیز فورات"و هەموو شەهیدانی رێگەی رزگاریی نیشتیمان. "بەرخودان ژیانە"
ناوەکان:
1.    لەتیف فاتیح فەرەج.
2.    دانا عەسکەر.
3.    رابەر رەشید.
4.    رێبوار رەشید (سەراب)
5.    نیهاد جامی.
6.    هاوڕێ عەبدوڵڵا.
7.    ئارام شوانی.
8.    هیوا حەسەن.
9.    سەرکەوت سابیر.
10.    شوان محەمەد.
11.     سەلاحەدین جومعە.
12.     فرمێسک خدر.
13.     رزگار حەساری.
14.    مەلا فەرمان.
15.    سەعید کاکەیی.

 

 

 

پەڕەى 1 لەکۆى 371 پەڕەدا

بابه‌ته‌کان

Scroll to Top